Progreso instalashon di lus led pa un iluminashon públiko mehorá

Entidat Públiko Boneiru ta kontinuá ku su esfuersonan pa mehorá iluminashon públiko na Boneiru pa medio di instalashon di lus moderno LED. Den e dianan binidero tin trabounan importante planiá ku lo trese kambio den iluminashon na diferente parti di nos isla. 

Riba djaluna 14 di ougùstùs WEB NV ta kontinuá ku instalashon di e lusnan akí riba Kaya Internashonal. Ta trata di e parti for di e krusada T ku J.A. Abraham Boulevard te na entrada di e anterior ‘catering’. E ‘upgrade’ akí lo no solamente mehorá visibilidat, pero e lo kontribuí tambe na un área mas seif pa tantu peaton komo outomobilista.

For di djamars 15 di ougùstùs te ku djaweps 17 di ougùstùs e trabounan lo enfoká riba e barionan Nieuw Amsterdam i Mamparia Kutu. Den bario Nieuw Amsterdam ta atendé spesífikamente ku e siguiente kayanan: Kaminda Pilon, Kaya Barakoa, Kaya Belua, Kaya Chi ku Cha, Kaya Parapeta, Kaya Piedr’i Mula, i Kaya Konfó. E ampliashon akí di iluminashon LED lo kontribuí na un mihó visibilidat i siguridat pa habitantenan di e barionan akí.

Riba djaweps 17 di ougùstùs e tim di instalashon lo sigui for di e ‘catering’ te na entrada di aeropuerto. Si tur kos kana segun plan, riba djabièrnè 18 di ougùstùs lo pone lus LED nobo for di entrada di aeropuerto te na Te Amo Beach.

Ta supliká outomobilistanan pa tene kuenta ku e trabounan akí i adaptá nan velosidat kaminda esaki ta nesesario. Siguridat kantu di kaminda tin e prioridat di mas haltu. Tambe nos ta hasi un kordial súplika na habitantenan di e barionan Nieuw Amsterdam i Mamparia Kutu pa no stashoná nan outo pegá ku e palunan di lus durante e periodo akí. Esaki lo promové un progreso rápido di e trabounan.

Diputado Thielman: ‘Entidat Públiko Boneiru i WEB NV ta determiná pa mehorá iliuminashon públiko na Boneiru i pa sòru pa áreanan bon visibel i seif pa tur habitante. Nos ta gradisí nos komunidat pa nan komprenshon i koperashon durante e proyekto akí.’