E siman akí a kuminsá e programa anual di angua kontra grip na Boneiru.
Hendenan den grupo di riesgo por tuma kontakto ku dòkter di kas pa traha sita pa e angua
ku ta grátis.
Hende riba 60 aña, hende ku malesa (manera diabétis, malesa di kurason, pulmon òf nir) òf
un resistensia abou, ta kore mas riesgo di salú ora nan haña grip. Ora un hende pasa e
angua di grip, su kurpa ta reakshoná trahando antikurpa kontra e vírùs di grip. Esei ta pone
ku e chèns pa haña grip ta mas chikitu. Por sosodé ku e persona akí tòg ta haña grip. E
angua kontra grip ta sòru e ora ei ku e ta bira ménos malu i e chèns pa komplikashon,
manera pulmonia òf problema ku kurason, ta mas chikitu.
Pa bon protekshon, un hende tin ku pasa e angua di grip tur aña di nobo. Mihó kos ta pa hasi
esaki promé ku komienso di e temporada di grip, na òktober òf prinsipio di novèmber.
Despues ta dura mas o ménos dos siman pa e angua kontra grip kuminsá traha.
Grip ta plama di mes manera ku COVID-19. P’esei tosa i nister den èlebog òf den un lensu di
papel i regularmente laba man ku awa i habon. E angua kontra grip ta protehá solamente
kontra e vírùs kontra grip. Pues personanan ku a haña e angua di grip, no ta protehá kontra
otro vírùs, manera e vírùs ku ta duna fèrkout òf e vírùs di corona.
Tuma kontakto ku bo dòkter di kas pa un sita pa wak si bo ta bin na remarke pa e angua.
Departamentu di Salubridat Públiko di Entidat Públiko Boneiru ta organisá e programa den
koperashon ku dòkternan di kas.
