Prome Minister
Evelyn Wever-Croes a elabora riba e topico di e periodo di Gobierno como demisionario.
Manera ta conoci eleccion a wordo yama pa dia 6 di december 2024, cual ta haci cu desde e
momento ey Gobierno di Gabinete Wever-Croes ta demisionario.
Kico ta un Gobierno demisionario?
Prome Minister a splica cu na momento cu un Gobierno ta demisionario, por tuma
decisionnan solamente riba asuntonan coriente, decisionnan, maneho, y proyectonan cu ya
caba tabata tin decision tuma riba nan prome cu Gobierno a bira demisionario, y cu ta
presupuesta den e presupuesto cu Parlamento a aproba pa aña 2024. Pa duna un splicacion
mas concreto, Prome Minister a tuma como ehempel e departamento di DOW y DIP, cu ta cay
bou su ministerio y cu ta esunnan encarga pa atende cu bouwvergunning. En caso tal un
persona a aplica pa un bouwvergunning, esaki ta un asunto coriente pasobra e no tin nada di
haber cu e minister y/of Gobierno. Tambe pa esnan cu tin peticion pa tereno, esaki ta cay bou
departamento di DIP, y mirando cu Gobierno a depolitisa e procesonan na unda no mester
firma di e minister, e proceso por sigui normal.
Tambe pa loke ta trata e departamento di DIMAS, di Impuesto y di Recurso Humano, na unda
tin personanan cu ta wardando riba un bouwvergunning, permiso di estadia of trabou, esnan
cu mester haya placa bek di belasting, y/of esnan cu ta wardando riba un promocion salarial,
tur esakinan ta procesonan cu lo sigui cana normal.
Pa loke ta encera leynan, tin varios cu a bay Parlamento caba y tin otro leynan cu ainda mester
wordo trata. Esaki ta kleda na Parlamento pa dicidi si ta yama e leynan aki pa tratanan of no.
Dos ley cu ta importante ta e presupeustonan, un ta e presupuesto 2025 cu ya ta na Parlamento
caba y cu parlamentarionan tin e luna aki pa haci preguntanan, di cual Gobierno lo contesta pa
asina por wordo trata prome cu 15 di december manera ley ta stipula. E otro ta e presupuesto
supletorio di 2024, cu ya a wordo trata den Conseho di Minister prome cu e Gobierno a bira
demisionario y ta na caminda pa Parlamento. Den e preupuesto supletorio tin algun proyecto
adicional cu a wordo anuncia, pero e fondonan no ta aproba ainda pa Parlamento.
Prome Minister a indica cu como Gobierno demisionario, ministernan no por tuma decision
pa cambia maneho, of bin cu cambionan cu no ta presupuesta, pero departamentonan lo sigui
traha normal. Cu esaki hopi no lo cambia pa e ciudadanonan di pais Aruba.
"Mi kier sigura cada un di boso, cu boso por sigui confia riba nos, den e mesun forma
responsabel, serio y cu stabilidad cu mi a bin ta goberna e pais aki pa e utimo 7 añanan, cu nos
lo sigui haci esaki tambe den e periodo demisionario, poniendo semper e interes di nos
ciudadanonan na prome luga", Prome Minister a expresa.