ORANJESTAD,Aruba
Dentistanan ta hopi preocupa cu e ultimo informacion di AZV caminda cu mas medida ta ser introduci pa corta gasto cu consecuencianan devastador pa cuido oral. AZV kier corta tur cuido dental pa esnan riba 17 aña, cual ta resulta den e percentahe mas grandi di nos poblacion.
Pensa riba:
– consulta di dolor (incluso ora di dentista na warda)
– potret ora di dolor
– tratamento di dolor di djente
– receta prescribi door di dentista
– biopsia
– trauma of accidente
– plancha (djente falso)
– ranca djente
Tambe lo saca orthodoncia for di e pakete pa esnan bou di 18 aña.
E pashent mes lo mester paga pa e servicionan aki for di su propio cartera.
Pashentnan ta ser perhudica pa cuido basico durante di crisis, e tratamento nan menciona ta un necesidad, no un luho. E cambionan drastico aki lo afecta precisamente esnan mas vulnerabel (cu menos recurso) den nos comunidad.
Ademas dentistanan ta lamenta e falta di transparencia di AZV.
AZV a impone tur medida a corto plazo y sin pensa riba e consecuencianan cu ta fatal pa e pashent y tambe pa AZV.
Problemanan dental ta trese complicacion pa e salud en general:
– problema pa kauw
– interaccion cu regulacion di diabetes
– problema pa curason/pulmon/stoma
– crea isolacion social
– problema (psycho)social (por ehempel ta bira mas dificil pa haña trabou)
Si un pashent no tin e manera pa paga pa e cuido necesario por spera cu un pashent:
– ta keda innecesariamente largo cu dolor
– lo tuma mas medicamento cu necesario y/of sin bon indicacion
– mas ziekmelding na trabou
– y ademas otro instancianan medico lo ser sobrecarga (un pashent cu pa motibo financiero no por permiti su mes di bai dentista lo bai hospital of su dokter di cas y na final di dia sin por ricibi e cuido adecua)
– ta bai bishita ‘dentistanan’ ilegal cu por forma un peliger pa su mesun salud, paso no lo tin regla di hygiena, garantia di diploma, etc.
Tur esaki lo tin un impacto negativo riba e calidad di bida di e pashent y ultimamento por ta hopi peligroso pa su salud.
Cu e medidanan aki e sosten cu Aruba a brinda mas cu 50 aña pa e cuido basico aki ta desaparece por completo, sin previo aviso. E ta trese un situacion hopi preocupante.
AZV ta boga pa accesibilidad di cuido, calidad di cuido na un prijs rasonabel.