E di 11 edishon di Pride Walk ta kla pa ranka sali awe djawebs 12 di òktober pa 7or di anochi en punto for di Riffort pa kue direkshon di Rainbow Park na Wilhelminaplein den Punda.
Curaçao Pride Foundation den kolaborashon ku nan partner prinsipal RBC Royal Bank i Dennis Mobile no a spar esfuerso pa hasi e edishon di Pride aki unu ku ta representá i selebrá diversidat den nos komunidat.
E edishon di Pride Walk 2023 ta karga e tema ‘Live in Color’. Biba bo koló. Ku e lema aki, kier enfatisá kon esensial ta pa haña bo identidat i wòrdu aseptá pa ken bo ta. Di wòrdu selebrá dor di un komunidat ku ta konsiente di e enrikesementu den diversidat i ku amor no konosé limité.
E ruta di Pride Walk a keda esun tradishonal ku ta sali for di Riffort, krusa Emmabrùg pa drenta Breedestraat pa kulminá riba Wilhelminaplein den kual e organisashon a transformá un Rainbow Park. Ku entretenementu di drag queens, DJ Jean Paul Paula for di Hulanda, AXL & Friends i un area pa relahá, disfrutá i kombibí ku otro.
Komunidat henter i personanan di LGBTQ+ en partikular ta keda kordialmente invitá pa duna sosten i apoyá den marcha òf kant’i kaya i hasi e edishon di Pride 2023 unu inolvidabel.
