Hopi awa a kai na Boneiru den e siman ku ta tras di lomba. Ora awa para e chèns pa sangura brui i kousa malesanan di infekshon manera Dengue, Chikungunya i Zika ta oumentá. Na e momento aki Departamento di Salubridat Públiko no a konstatá e malesanan aki na Boneiru pero ta bon pa prevení.
Prevenshon di lugá di brui di sangura ta e mihó manera pa kombatí plamamentu di e malesanan aki. Pa e motibu aki Departamento di Salubridat Públiko ta hasi un yamada riba tur hende pa hasi tur artefakto den kas, den kurá i den bisindario ku ta òf por kontené awa bashí i tirá nan afó òf warda nan. Ta trata aki di artefakto manera baki di plèstik, tayer di outo, bòter, baki di kuminda, tapa, vas i skòter bou di baki di mata.
Na Boneiru nos konosé diferente tipo di sangura. Tin solamente un tipo di sangura, e sangura Aedes Aegypty, ku nan ta yama tambe sangura di dengue, ku por transmití Dengue, Chikungunya i Zika. E sangura aki ta pika prinsipalmente durante dia i por rekonosé na su pianan ku strepi blanku. E sangura di dengue ta biba den serkania di hende i por hañ’é prinsipalmente den kas i den kurá. E sangura muhé ta pika hende pa por chupa sanger ku e tin mester pa alimentá e webunan den su kurpa. Despues e ta buska artefakto den kurá i bisindario kaminda tin awa limpi pa pone su webu nan. E sangura di dengue preferibelmente ta pone su webunan den artefaktonan artifisial ku banda liso, manera plèstik i tayer di outo. Si bo sòru ku den bo kurá i bisindario no tin ningun artefakto ku awa por keda para den dje, bo ta prevení ku e sangura ta brui den bo kurá i bisindario. E sangura di dengue ta biba den kas tambe. P’esei sòru pa bo kas ta liber di sangura pa medio di flit regularmente i sòru pa sangura no por drenta bo kas, por ehèmpel mediante uso di skrin dilanti bo bentananan.
Renbak, barí i hèmber pa fangu awa aden ta lugánan ideal di brui pa e sangura di dengue. Pa e motibu aki ta supliká hendenan ku ta fangu awa di yobe pa nan matanan òf bestianan pa sera esakinan bon pa sangura ku por ehèmpel un pida paña òf skrin pa sangura ku un elastík rònt di dje i kontrolá esaki regularmente. Bo por tuma kontakto ku Sekshon di ‘Vector Controle’ pa konseho i pa laga trata renbak i barí di awa.
Pa mas informashon tokante loke bo mes por hasi i loke gobièrnu ta hasi, lesa nos foyeto ‘Protehá bo mes kontra sangura i prevení lugá di brui di sangura’. Bo por lesa e foyeto aki riba wèpsait di Entidat Públiko Boneiru www.bonairegov.com.