Dutch Caribbean Nature Alliance (DCNA) y Fondo Mundial pa Naturalesa (WWF-NL) ta contento cu e presupuesto pa proteccion di naturalesa den Caribe Hulandes cu e gabinete a reserva pa e proximo periodo di gobernacion. Siman pasa a anuncia cu gobierno kier destina mas di 35 miyon extra pa naturalesa den Caribe Hulandes, tal y como manera tuma den e acuerdo di gobernacion.
E mas di 35 miyon ta wordo poni na disposicion di implementacion di e Plan di Maneho Ambiental y di Naturalesa (PNMB) den Caribe Hulandes. PNMB ta un programa ambicioso pa naturalesa y medio ambiente cu ta core te aña 2030. Ademas di e contribucion pa naturalesa, tambe a inclui un post structural di 30 miyon anual den e acuerdo di gobernacion pa proteha cultura y naturalesa den Caribe Hulandes. Esaki por wordo uza pa trata asunto a largo plazo, manera tratamento di awa di beerput y recogemento di sushi.
“Nos ta hopi agradeci cu a reserva dies miyon den e presupuesto pa fortalece maneho di e parkenan natural na Boneiro, Saba y Sint Eustatius”,Tadzio Bervoets, director di DCNA, e organisacion coordinador di tur e parkenan nacional den e seis islanan di Caribe Hulandes a bisa. “Esaki ta demostra un biaha mas e importancia cu e parkenan tin den preservacion di naturalesa na y alrededor di nos islanan. Nos ta spera cu esaki lo conduci na un fortificacion structural a largo plazo di e parkenan natural, no solamente den Caribe Hulandes, sino tambe den futuro pa Aruba, Corsou y Sint Maarten”.
“Cu e placa aki por tuma medida serio pa proteha e biodiversidad vulnerabel”, Arjan de Groene, Coordinado di Paisahe di Caribe Hulandes, di WWF-NL a bisa. “Nos ta feliz di traha cu e minister, e mandatarionan y organisacionnan local na implementacion adecuado di e presupuesto aki. Lo ta bon si nos por hiba un conversacion tocante esaki a corto plazo”.
Naturalesa den e parti Caribense di reino ta empeorando durante añanan caba. Riba tera, erosion y construccion di cas ta avansa cada vez mas, y bou di awa e rifnan di coral ta deteriora severamente debi na contaminacion y cambio climatico. Por lo tanto, e presupuesto nobo aki ta hopi necesario pa haci naturalesa saludabel atrobe.
