Minister Maduro di Finansa durante tratamento di e Segundo Cambio di Presupuesto 2023 den Parlamento:
Parlamento di Aruba a trata e Segundo Cambio di Presupuesto 2023 den cual tin un resultado financiero cu ta mas positivo cu a premira. Despues di hopi aña Aruba ta conoce un presupuesto cu tin un surplus y na final di aña 2023 por raporta cu Presupuesto 2023 tin un surplus aun mas halto, debi na e recuperacion economico fuerte cu turismo a trece pa Aruba.
Na comienso di aña a premira cu Presupuesto 2023 lo conta cu un surplus di 1% di nos GDP. Sinembargo ya na momento cu a haci e prome cambionan den Presupuesto 2023 na september, por a ripara cu e surplus lo bira mas halto y a yega 1,3% di nos GDP na e momento eynan. Awo na fin di aña 2023, nos por constata den e Segundo Cambio di Presupuesto 2023, cu e surplus ta aun mas halto y ta yega na 1,9% di nos GDP.
E surplus mas halto aki den Presupuesto 2023, ta e resultado financiero di tres factor. Na prome luga, un efecto di agio como resultado di e ultimo bononan cu Gobierno a emiti. Na di dos luga, a haya mas entrada di belasting debi na e crecemento economico impulsa pa un turismo creciente na nos Pais. Na di tres luga, un extra dividendo di AAA cu ta e resultado di un aña record den yegada di turista na nos Pais.
Manera custumber, oposicion ta bruha tera bisando cu ta medida a percura pa un situacion di surplus den Presupuesto 2023. Sinembargo si nan cana rond, nan mes por ripara cu Aruba su economia ta bayendo bon debi na e tantisimo turista cu ta bishita nos Pais. Poco dia mes, AAA a raporta cu nan tabata tin un aña record di turista cu a haci uzo di nos airport. E informacion aki banda di e raportnan di Banco Central di Aruba y di Fondo Monetario Internacional IMF cu ta menciona con fuerte e crecemento den turismo ta na Aruba, ta prueba palpabel cu turismo creciente ta e forza principal tras di e resultado financiero mas positivo den Presupuesto 2023.