ORANJESTAD,Aruba
Stephan a papia palabra cla den Corte diabierna. “El a mata mi tata caba y mi no ta bay lague matami.” E tabata referi na Jason Mathilda, kende ta sera hunto cun’e den KIA y kende a wordo haya culpabel di a hinca Gilbert Regales mata banda di Bam Bam Cafe.
E hecho cu e agresor di Regales (Jason Mathilda) y e yiu di Regales (Stephan Martina) ta cera hunto a percura pa cierto tension den KIA.
E tiramento di palabra, e rabia y otro emocionnan a contribui na e sucedido di juli, 2019. Na momento cu Mathilda tabata den un area habri, pateo, a surgi un enfrentamento. Mathilda, segun e acusado Martina, ta esun cu a provoca henter e situacion y KIA tambe ta responsabel, door cu e personal no a cumpli cu reglanan di siguridad. A laga Mathilda ta canando su so den un area cu e mester ta den compania di guardianan di siguridad y den bisindario di Martina.
Segun e acusado, Mathilda ta esun cu a cuminsa cu e provocacion pidiendo su amigonan preso pa pas’e un cuchiu y el a kita flanel manera cu e tabata cla pa bay bringa. Esaki “a pone nos den alerta. El a mata mi tata y mi no ta bay lague haci mesun cos cu mi,” Martina a conta Hues. P’esey asina cu el a kita su flanel, nan tres a core bay riba dje y a tire na suela unda nan a cuminsa sute cu mokete y skop. Martina ta admiti tambe cu e tabatin e obheto cu punta skerpi, pero cu esaki tabata simplemente algo traha cu e material di un emchi. Pero cu e no ta algo cu e mes a traha, pero a hay’e den baño y a pasa man cun’e.
Den e filmacion cu a pasa den Corte di e sucedido, por nota tur cos a dura un cinco minuut, prome cu e guardianan a yega na careda pa salba Mathilda for di man di e trio. Asina mes el a keda cu su banda di cara robes complementa na sla y hincha. Un hecho pa cual el a keda interna den hospital varios dia.
E otro presonan envolvi den e caso aki ta Erick Minguel Schneiders, kende ta sintando un castigo di 14 aña di prizon caba pa asesinato cometi na 2017. El a tira un homber mata dilanti di Olden Molen, y Luis Mejia. E ultimo aki hunto cu un amigo a tira riba un hoben den area di Tanki Leendert. Pa e hecho aki Corte a impone un castigo di 8 aña incondicional. Erick Schneiders a nenga di declara of papia di e caso aki den Corte.
Abogado di Martina a pidi pa un rapport psychiatrico. Pero Hues a bisa cu e lo mira na final cu si ta necesario, e lo ordena pa laga traha e rapport aki.
Pa Ministerio Publico a keda legalmente proba cu e trio a purba mata Jason Mathilda y ta basa su mes riba imagennan di camara di siguridad. Nan tabata tres contra un pa cual e acusacion ta proba, segun fiscal. Pa esaki el a pidi 30 luna di castigo.
Aki dos siman tin sentencia, 21 februari, tin sentencia.
