Komishon Bario Brievengat a lanta netamente pa por defende interés di e bario Brievengat en general i e habitantenan en partikular. P’años infrastruktura i limpiesa den nos bario támpoko no a haña e atenshon nesesario. KBB ke yuda kopera i kontribuí ku nos Bario i Pais, pero gobièrnu tin ku duna nos e oprtunidad pa splika i trese nos plannan dilanti. Djís un ehèmpel. Fo’i sèptèmber 2020 nos a manda karta pa gobièrnu i minister di Tráfiko, Transporte I Planifikashon Urbano pa por tende nos. Nos no a haña kontesta ni támpoko a wòrdu invitá te ku fecha di awe. Gobièrnu pa medio di un Landsbesluit a lanta un organisashon pa inventarisá, atende i trese bienestar den tur bario na Kòrsou. Pero, nos no a mira nan nunka den nos Bario i konsekuentemente tur kos a sigui empeorá tantu serka nos i den e otro barionan. Hopi reklamo di habitantenan di Brievengat. Kareteranan rondo di BonBini Supermarket ta den un situashon deplorabel. Den Kaya Thomas Henriquez tin petishon pa laga pone drempel pa baha velosidat di autonan p’asina evitá aksidente kontra Hende grandi i mucha. Tin habitante ku no por drenta nan kas pa motibu di burakunan yena ku awa. Di otro banda tin drempelnan tambe ku ta stroba awa di sigui kore i asina e awa ta keda para o sea den kaminda i forma plas di awa dilanti porta di kas di Hende. Zebrapad nan den bario no tin ferf mas. Tur Hende por pasa i wak ta ki disaster tin den e kayanan di Brievengat ku ta entre otro: Kaya Paul de Lima – Kaya Augusto Boelijn – Kaya Thomas Henriquez – Kaya Jules Blasini.
Ta pesei ta bai un apelashon na Gobièrnu pa sinta ku KBB p’asina nos por trese ideanan dilanti p’asina na un manera struktural i permanente solushoná i alivia a korto plaso e problemanan den nos bario.
