Presidente di Vereniging Rijscholen Aruba (VRA) Thomas Ruiz ta kere cu a yega ora pa sinta na mesa. For di algun luna atras a cuminsa pa asina reforma e examenrijbewijs, pero te ainda tur cos ta keto. Sinembargo na momento cu e cuminsa cu e parti aki a ripara cu e problema ta hopi mas grandi di solamente reforma e sistema di rijbewijs na Aruba.
Segun Sr. Thomas Ruiz tur loke cu tin di haber cu trafico tin un of otro punto cu no ta canando bon y cu mester di cambio y cu mester wordo revisa. Actualmente tin un problema cu companianan di seguro, pa e motibo aki mes a haci un peticion na minister concerni debi cu mester sinta na mesa cu e asociacion di seguro of tur e seguronan cu tin na Aruba pa por cana riba mes un liña.
No por ta asina cu tin diferencia di interpretacion di leynan, Aruba tin un ley di trafico y tur hende mester ta riba e mes un liña, sinembargo esaki no ta sosode. Esaki por trece situacionnan cu por trece trafico na peliger, pero tambe por perhudica e consumidornan. Na mes momento e efecto por haci cambio di e manera cu ta siña na scol e reglanan di trafico fundamentalmente, pero tambe lo e por tin influencia riba e manera cu ta traha examen.
Na e momentonan aki Vereniging Rijscholen Aruba (VRA) ta trahando conhuntamente cu otro stakeholder manera officier y OM pa por haya un contesta riba preguntanan cu ta haya dirente situacionnan y e situacion cu tin actualmente cu no ta na su luga.
Segun Thomas Ruiz di Vereniging Rijscholen Aruba (VRA) e prome problema cu a topa cu ne ta e articulo 5 di e leynan di trafico cu ta regarda e maneho bao di influencia di alcohol y droga. Ley ta bisa cu no ta prohibi pa maneha bao di influencia di droga cu alcohol y pa ta mas specifico no ta trata solamente di droga malo cu ta bende riba caya, pero droga ta significa pilder di remedi tambe cu un persona mester uza paso e ta bao di un tratamento. Ora cu ta papia di droga den ley ta papia di licito y ilicito, esaki kiermen cu medicina tambe ta cay bao di esaki.
Sinembargo segun Thomas Ruiz di Vereniging Rijscholen Aruba (VRA) loke ley ta bisa cu no por surpasa e limite di e tolerancia cu ta surpasa y pesey ora cu blaas tin un limite di 220UGL, si supla bao di dje ley ta bisa bo a cunsumi pero e ta bao di e grado cu por y mas maneha. Pero na momento cu ta surpasa e limite e ora e polis por duna e prohibicion pa por maneha. E ley ta masha conoci bao di e comunidad di Aruba. Sinembargo tin casonan cu ta pasa unda cu tin accidente ta tuma luga y a bin resulta cu e interpretacion di e seguro ta full diferente cu locual cu polis y ley ta interpreta.
Loke cu a resulta ta cu seguronan tin un clausula na unda cu ta bisa cu no mag di uza yun droga of alcohol. Si mester mira esaki bon e seguronan mes a traha nan regla y nan ley, y pasa riba e ley oficial di landAruba. Segun Thomas Ruiz di Vereniging Rijscholen Aruba (VRA) den e caso specifico aki cu ta papia e seguro envolvi tin un uitspraak di hues cu a duna nan rason tambe. Sinembargo esaki ta hopi peligroso mirando cu nos leynan ta bisa otro , e ta un decision contrario na otro cu e uitspraak di hues a saca.
Tin casonan cu a pasa na momento cu accidente a tuma luga y polis ta haci su chekeo y ta resulta cu e persona ta bebi pero e no a pasa e limite di loke cu e por core auto , pero e asegurado si a pone den su documentonan cu e ta bebi y aki ta caminda cu e chauffeur ta wordo perhudica unda cu nan no lo cubri nada pa e chauffeur. Seguronan mes tin nan clausula independiente y ta pasa riba e ley di land Aruba. E situacion aki ta hopi peligroso cu mester keda atendi. Sinembargo e hues a bay riba cu e cliente sa cu e la firma e clausula y esaki a crucifica e chauffeur, sinembargo pa ley e seguro no tabata actua bon, pero debi cu a firma e clausula y e cliente no ta wordo avisa cu e clausula aki ta existi mas dus cu e ta firma un documento sin cu sa kico realmente tin riba dje debi cu e clausula ta skirbi cu letternan asina chikito cu e cliente no ta tuma nota di dje. Di e manera aki e seguro ta gaña e cliente y hinca e cliente den trampa y na unda cu debi cu e la firma e seguro a gana e caso. Esaki ta situacionnan cu a pasa y ta pasando na Aruba. Segun Thomas Ruiz di Vereniging Rijscholen Aruba (VRA) ta puntonan cu gobierno mester atende debi cu no ta na su luga cu seguronan di nan mes ta dicidi di cambia ley y cana e camindanan na nan manera. Mester sinta na mes urgentemente pa e puntonan aki.