Den oranan di mainta bloke sindical a cana for di Wilhelmina park pa Bestuurskantoor pa hiba un manifiesto pa Prome minister di Aruba Evelyn Wever Croes. Na yegada e mandatario a baha abao y a scucha e sindicatonan nan malcontento. Presidente di Sindicato di Douane Edward Maduro a cana na cabes di e manifiesto aki y ta esun cu a vocifera na prome minister Evelyn Wever Croes tambe na momento di entrega di e manifiesto.
Presidente di Sindicato di Douane Edward Maduro a vocifera pa henter e bloke di sindical cu nan no ta diacuerdo y no ta acepta e e landsbesluid presentatie beoordeel overheidspersoneel AB 2022 number 165, esaki ta wordo reenforsa mas den e ultimo dianan aki y bao di e trahadonan di gobierno ta reina hopi desconfiansa y insiguridad.
Segun Presidente di Sindicato di Douane Edward Maduro ta un lastima cu gobierno di Aruba no ta tene cuenta real cu e preocupacionnan di e sindicatonan y nan miembronan. Tur esunnan presenta cu ta trahadonan di gobierno ta exigi lo siguiente : 1, Respeta trahadonan di gobierno cu nan derecho , stabilidad di trabao y nan entrada. 2, Pa un gobierno cu kier papia di respet berdadero no sigui ta impone pa su trahadonan acepta un sistema asina cu sa di antemano cu lo perhudica e trahadonan. 3,
Pa gobierno den su rol di dunado di trabao ta sincero y transparente cu sindicato den representacion di su miembronan den temanan manera esun actual di e prestatiemanagement system cu tin consecuencianan asina pisa cu posicion huridico di e trahadonan y su futuro.
Pa e motibo aki mes sindicatonan kier confia cu loke a sosode na 2020 unda cu gobierno a impone medida riba empleadonan publico no bolbe ripiti y cu tampoco sigui haci daño na e trahadonan.
Miembronan di diferente sindicatonan ta pidi pa revoca e ley. Tambe den e manifiesto sindicato ta desea pa gobierno informa nan como sindicato cu e ley a keda revoca no mas tarda cu dialuna 20 di maart 2023 pa 4 or di atardi.
Si acaso e sindicatonan SEPPA,SADA,SIMAR,SPA y FTA no haya e reaccion positivo pa e fecha menciona , e mensahe pa gobierno ta cu lo bolbe convoca un accion di protesta diamars 21 di maart 2023 pa 8 or di mainta pa exigi un contesta.
