Presidente di sindicato Central di sindicato Corsou Edward St .Jacobs : Gobierno Pisas ta hala artesanonan sin tin un plan concreto di renobacion

Dialuna ultimo artesanonan di Corsou cu ta bende na Otrabanda a ricibi e noticia cu prome di september 2021 nan lo mester muda pa un otro caminda. Segun e artesanonan e manera con nan ta keda trata ta un falta di respet. Pa e motibo aki nan a acerca presidente di sindicato Central di sindicato Corsou Edward St .Jacobs pa sali na nan defensa.
E presidente di e sindicato a cuminsa cu e entrevista mandando un mensahe pa e gobierno di Corsou unda cu gobierno pisas a bin ta para pe y nan lema ta ‘’ Di Pueblo Pa Pueblo y Hunto Cu pueblo’’ segun Sindicato St .Jacobs esaki ta e lema di e gabinete Pisas cu ta goberna Corsou na e momentonan aki. Tambe ta kere cu e lema ey mester keda zona tanto den comunidad y tambe den mente y curason di cada un di e representantenan di pueblo.
Loke ta un realidad cu dialuna ultimo e artesanonan cu ta traha na otrabanda a haya un carta di representantenan di Ministerio di desaroyo economico MEO di su departamento di inspeccion unda cu e carta ta bisa cu e artesanonan tin cu bandona e standnan na otrabanda pa motibonan cu e standnan ta den condicionnan basta deplorabel.
Sinembargo tin mas cu 10 aña cu e personanan aki ta apela pa hala atencion pa por tin un maneho y of un manera pa por drecha e standnan. presidente di sindicato Central di sindicato Corsou Edward St .Jacobs ta duna di conoce cu e kier ta hopi cla, cu si e situacion di e standnan ta malo ta berdad y si tin cu drecha nan ta kere cu mester haci esaki hopi lihe.
Sinembargo no por ta asina cu gobierno ta dies bin caminda cu tin 26 artesano unda cu ta mama y tata di famia ta labora tur dia pa nan por tin nan pan di cada dia sin tene cuenta cu nan tambe a pasa den un situacion di COVID pa 18 luna largo sin tabatin entrada y tampoco no a haya e ayudo di subsidio di gobierno, awor cu e situacion ta hayando bida ta scoge pa saca e artesanonan pone nan otro caminda.
Segun presidente di sindicato Central di sindicato Corsou Edward St .Jacobs pone e artesanonan otro caminda tampoco no ta un problema, pero e mester keda bon regla. Bao di e tent nan na otrabanda tin 26 persona cu ta traha y na unda cu tin 26 mesa, pero na unda cu kier muda nan tin solamente 5 espacio y cu tampoco nan no tin un mesa fiho.
Na e momentonan aki cada artesano tin nan mesa caba sin ningun problema, pero cu e situacion aki ta bay habri discusion entre dos grupo unda cu sigur ta bay tin un conflicto entre nan cu nan debi cu no tin suficiente espacio.
Segun presidente di sindicato Central di sindicato Corsou Edward St .Jacobs gobierno mester analisa e situacion aki bon y percura pe e artesanonan por haya luga y cu nan por traha pa nan pan di cada dia y haci e trabao cu mester wordo haci den e tempo stipula pa hacie.
Na momento cu e artesanonan a haya e carta por a compronde cu gobierno no tin ningun placa presupuesta pa e proyecto aki. Esaki ta significa cu nada no ta cla. No ta un bon decision pa hala nan si no tin un plan ki dia e proyecto ta cuminsa y ki dia e ta caba pa nan sa ki temporada nan lo por bolbe bek nan luga unda cu nan tin nan garantia di trabao.