Aunke cu gobierno ta demisionario trabounan na parlamento mester sigui. Awe den oranan di mainta tabatin un reunion den agenda unda 13 miembro di parlamentario tabata presenta, 9 ta di MEP, 2 parlamentario di MAS, 1 di AVP tambe t’ey den edificio y na unda cu reunion por a ser yama pero no a wordo yama paso lider di fraccion di RAIZ no tabata presente den parlamento y a pone cu presidente di parlamento cu ta di e mes un fraccion RAIZ cu si tabata presente no a cuminsa cu e reunion. Esaki ta muestra di e incapacidad cu fraccion di RAIZ tin di kico ta politica y gobernacion na Aruba.
Aki ta caminda e democracia di Pais Aruba ta hunga un rol unda cu politica nobo ta bin ta pretende di ta un manta nobo den politica pero e realidad ta cu nan no tin un vision , un bunul di kico ta politica na Aruba. Ta un tristesa cu Aruba ta pasando den un situacion asina cu politica nan nobo inmadura pa un pais sigui drey.
Parlamentario Edgar Vrolijk a vocifera via di su plataforma di facebook riba e imparcialidad cu tin unda cu su persona a ser acusa semper na momento cu tin e posicion di presidente di parlamento y awe por mira e fraccion di RAIZ cu ta tilda nos no ta nan, por mira claramente cu nan ta e peor partido cu Aruba por a duna sosten den e gobernacion pa coalicion cu MEP.
Lider di Fraccion RAIZ no a ni presenta na trabou y su aliado cu e la bringa pe pa sinta riba e stoel di presidente di parlamento no por tuma decision riba su mes y presidente di parlamento Raymond Kamperveen a cancela e reunion.
Sinembargo fraccion di MEP tabata prepara y cla pa debati y den e reunion unda cu lo a haci e peticion pa entrega un di e carteranan di oudernzorg na fraccion di MAS y tambe a bin pa haci dos cambio na e comision di transporte cu parlamentario Hendrik Tevreden ta pidi e comision aki y tambe e comision di medio ambiente pa pasa pa parlamentario Edgar Vrolijk mirando e tiki trabounan cu a keda haci den tur e añanan cu a pasa.
Sinembargo presidente di parlamento nobo Raymond Kamperveen a opta pa no yama e reunion unda cu pueblo di Aruba por mira e imparcialidad cu RAIZ no kier yama e reunion paso nan kier pretende awo si cu “afspraak is afspraak” y kier keda cu e comisionnan. Sinembargo nos tur por corda cu nan mes como RAIZ a kibra e “afspraak “di gobernacion y prome Minister Evelyn Wever Croes mester a baha e gobierno debi cu a kibra confiansa y no a respeta palabracionnan gubernamental. E inmadurez politico di RAIZ ta pone loke cu Aruba ta pasando na e momentonan aki.
Parlamentario Edgar Vrolijk ta duna di conoce cu democracia a keda sirbi un biaha mas unda cu tabatin un coalicion nobo dia 9 september unda parlamentario Benny Sevinger tabata presente 8 or di mainta pa vota hunto cu fraccion di AVP y awe un miembro so tabatey. Awe por mira claramente cu RAIZ a brasa AVP, Gerlien Croes independiente y Accion 21 pa kibra democracia, kibra gobierno y kibra desaroyo na Aruba, cu esakinan Aruba ta canando den un direccion robes.
E kiebro cu RAIZ a haci ta hopi malo pa parlamento unda cu hopi proceso cu mester a cana no por termina cu nan pa e KIER di RAIZ y ta perhudica Parlamento formalmente. Pa ta un politico esaki ta significa madurez, bo mester tin madurez politico pa por dirigi Aruba , esaki no ta wega y e no ta un show . Den parlamento tabata presente tur 9 parlamentarionan di fraccion di MEP, 2 di MAS,1 AVP cu ta forma 13 y presidente di parlamento Kamperveen , pero tambe Misha Raymond lider di fraccion RAIZ a bin firma y despues a bandona edificio di parlamento bay cas bek.
Esunnan cu NO a presenta na pia di trabou pa cu e reunion y trabounan den parlamento ta AVP, menos Mervin Wyatt Ras, Accion 21, Gerlien Croes independiente, Ryçond Santos do Nascimento independiente y lider di fraccion RAIZ.
Awe 24 september reunionnan mester a tuma luga pero presidente di Parlamento di fraccion RAIZ a kibra democracia pa wega politico un biaha mas na momentonan crucial unda cu parlamento tabata cana den un nivel halto y awe e la cay baha te na vloer. Fraccion di MEP ta lamenta kico ta pasando pero na mes momento ta kere cu ta importante pa Aruba sa con democracia di Aruba ta ser kibra pa capricho politico di partido RAIZ.