Awe mi ta presenta e di dos edicion di ‘Presidente di Parlamento ta informa’. Den e di dos edicion aki lo mi enfoca riba automatisacion di entrada, reglanan nobo, codigo di conducta y Reglement van Orde nobo.
Automatisacion di entrada
Ora mi a drenta como Presidente mi a haya inversionan haci caba pa por tin entrada automatisa. Pero banda cu debi na falta di boluntad pa tuma decision pa esaki por a cuminsa funciona, a haci cu varios inversion no tabata sirbi mas, entre nan e baterianan. E decision no a bai facil pero na final di dia a haya sosten di un mayoria y esaki a ser concretisa. Awendia e ta un exito y ta planiando pa e siguiente stap cu lo mester bira e oficina di Parlamentarionan.
Reglanan nobo
Pa luna di augustus, si tur cos cana bon, lo implementa algun regla nobo cu mas bien ta percura pa ordena con ta atende den parlamento. Hopi di esakinan ta basa riba regla y leynan di otro Paisnan den Reino y tambe a base di consulta cu trahadonan. Un di e cambionan ta cu lo bai ordena e espacio oficial pa prensa y tambe pa bishitantenan. Actualmente ya ta implementando algun regla nobo caba pa ministernan ora nan ta na parlamento y esakinan ta bayendo sublime.
Codigo di Conducta y Reglement van Orde nobo
Banda di esaki mi persona a percura pa un draft di un codigo di conducta a base di un mocion cu a wordo presenta y entrega door di Parlamentario Shailiny Tromp-Lee durante un reunion publico y cu a pasa den Parlamento unanimante. Pero awo e ta den man di e 20 Parlamentarionan pa revisa y duna feedback pa complementa esaki of pa presenta un nobo si nan no ta mira nan mes den e draft aki. Tin di bisa cu esaki no tabata un tarea di mi persona pero ta responsabilidad di tur parlamentario pero a yuda den esaki pa asina hunto logra yega na un codigo di conducta.
E Reglement van Orde nobo mi persona a traha riba esaki y a ser comparti cu cada miembro di Parlamento. Esaki ainda tin di ser studia y discuti pero tambe ta mara na con lo independisa parlamento pa wak si esaki ta cuadra cu otro. Pero mucho cambio no ta ser premira, p’asina unabes aproba esaki por cuminsa e proceso di ley prescribi.
Den e siguiente edicion lo mi enfoca riba Regeling Fractieondersteuners y richtlijn fractieondersteuners.
Pa mas informacion por subi riba Parlamento di Aruba su website na www.parlamento.aw of por bishita nos pagina di Facebook: ‘Parlamento di Aruba”.
