Edgard Vrolijk
Parlamento actualmente ta cu reces y lo ta bek na trabao dia 16 di augustus. Sigur ta hopi importante pa informa pueblo di e procesonan y sigur e trabaonan cu a bin ta haci desde apertura di aña Parlamentario 2022-2023 te cu reces di juli. Den e prome parti mi informa tocante e cantidad di Reunion Publico (‘Openbare Vergadering y Encuentro Publico (‘Openbare Bijeenkomst’) tabatin de cu awor pa e aña Parlamentario 2022-2023. Den e di dos parti aki mi lo informa pueblo con e proceso di independisacion di Parlamento ta canando.
Independisacion di Parlamento
Pa hopi aña esaki ta un topico cu ta riba agenda di tur presidente pero cu pa diferente factornan no a ser concretisa y un di nan ta cambio di constelacion unda cu den mayoria biaha no tin continuidad pero ta bolbe cuminsa di nobo. Na e momentonan aki e comision encarga cu independisacion ta practicamente cla cu e cambionan constitucional. Si tur cos cana bon, prome cu fin di augustus lo mester manda esaki DWJZ pa e departamento aki haci un revision tecnico pa despues por manda esaki na Gobierno di Reino. Una bes cu esaki pasa e proceso aki lo mester atende como un ley den Parlamento y ta spera di por keda cla prome cu fin di aña 2023, si haya cooperacion di DWJZ cu ta un departamento hopi druk. Banda di esaki pa fin di augustus e comision lo mester keda cla tambe cu e Reglement van Orde nobo cu tambe tin di bay DWJZ pa revision tecnico. Despues di esaki e mester wordo manda na Raad van Advies y pa finalmente e ser trata den Parlamento. Nos ta spera di logra esaki tambe prome cu fin di aña 2023. Di tercer kwaartal di aña 2023 DRH lo duna nos un startnotitie na unda cu lo mester tuma desicion con e structura di trahadonan lo mester ta pa e funcionamento independiente di trahadonan y unda desicionan mester ser tuma. Unabes cu esaki termina lo mester finalisa algun protocol y pa asina porfin Parlamento por ta independiente. Nos meta ta pa e proceso ta completamente cla pa 1 di januari 2025.
Den proximo edicion lo enfoca riba e mehoracion di infrastructura y ampliacion di personal di Parlamento.
Pa mas informacion por subi riba Parlamento di Aruba su website na www.parlamento.aw of por bishita nos pagina di Facebook: ‘Parlamento di Aruba’.
Comunicado Presidente di Parlamento Edgard Vrolijk
