Pronto lo habri un aña parlamentario nobo, cu lo bira aña parlamentario 2024-2025.
Sigur tur aña parlamentario tin su retonan cune pa por logra locual ta propone, pero e
reto di mas grandi ta pa termina locual cu falta ainda. Nos no por lubida cu e aña
benidero ta aña di eleccion na Aruba! Pa awe lo mi elabora riba tur locual a logra di
2021 te cu 2024 aki na Parlamento di Aruba.
Vision y Meta
For di e momento cu mi a tuma e reto pa ta presidente di Parlamento mi a percura pa
fiha un vision pa e organo mas halto den nos pais. Parlamento di Aruba merece di keda
reconoci como un Hoog College van Staat. Pa por logra esaki mester a mehora e
funcionamento y proceso di Parlamento, structura Parlamento, percura pa mas
personal, modernisa e edificio conforme standard y percura pa e independisacion di
Parlamento.
Metanan logra
Mi por bisa cu mi ta hopi contento y orguyoso cu mayoria di locual a keda proponi, a
keda logra tambe. Akinan ta sigui un resumen cortico di e logronan:
Introduccion di huishoudelijk regels nobo
E introduccion di huishoudelijke regels nobo a aporta na reunionnan mas trankilo,
ordena, structura cu reglanan fiho y cla pa tur cu ta participa.
Reglanan pa fractieonderesteuners
Pa un funcionamento optimal tanto pa parlamento como pa cada parlamentario y su
fraccion, e ta importante pa e fractieondersteuners sa kico Parlamento di Aruba ta
spera di nan y tambe kico nan por spera di nos.
Mehora e regeling stichting fracties
Nos no por lubida locual a sosode den e periodo anterior unda un parlamentario a hay’e
envolvi den Caso Diamante pa actividadnan dudoso cu a sosode den su fraccion. Pa
nos cumpli cu reglanan di good governance a ahusta e regeling y asina ‘tapa e
buraconan’ cu tawata tin den e regeling.
Cambia e maneho con ta procesa leynan
A percura pa nos tin un proceso duidelijk y tambe mara na tempo pa evita cu leynan ta
keda ‘drumi’ riba lessenaar y ta keda pega sin tin mester.
Maneho nobo pa atende cu peticionnan di reunion
A percura tambe pa bini cu un maneho unda ta describi con tin cu atende cu peticion di
reunionnan: cua ta bira reunion publico y sigur cua ta bai pa commicion atende cu
esaki.
Cada un di e cambionan aki tawata crucial pa aporta na un Parlamento mas eficiente.
Esaki a keda comproba tambe mirando cu nos ta baha reces cu 0 ley pendiente pa
atende. Banda di esaki a enfoca tambe pa transparencia di documentonan, unda awo
tur documento ta accesibel y tur presentacion den reunion publico ta visibel pa pueblo.
Mi no por keda sin menciona cu locual a percura pa tur esaki tuma lugar ta e confiansa
brinda na e staff di Parlamento. Cada trahador sa kico ta e meta cu mester logra y ta
aporta pa nos logra esaki hunto pa Aruba. Pa 2024 a atende cu falta di personal unda a
habri 6 posicion di cual algun ainda ta den e proceso di selectie y pa 2025 lo habri 2
posicion mas pa asina ekipa Parlamento di Aruba aun mas. Ta importante pa mi
menciona cu ta trata di funcionnan cu tin decadas sin yena y nos mester di esakinan pa
garantisa e continuidad di desaroyo y eficiencia di nos instituto.
Masterplan di edificio di Parlamento
Manera menciona anteriormente na momento cu mi a asumi liderasgo di Parlamento a
percura pa bin cu un masterplan pa e edificio di parlamento. Lastimamente, e edificio tin
su añanan y ya e no ta apto mas, e no ta accesibel pa tur hende (p.e., rolstoel
vriendelijk) y e no ta un edificio moderno pues no ta refleha e vision moderno pa
Parlamento.
Den cuadro di esaki a cuminsa cu e prome fase cu algun siman atras a termina unda a
cambia tur bentana y porta, a pone glasnan cu ta mas eficiente pa uso di energia, pero
cu alaves ta mas safe cu esnan prome y a duna e parti dilanti un bunita pintura. Pa
comienso di september lo cuminsa cu e parti mas grandi unda ta bay basha e parti
patras di e edificio abou mirando cu e ta afgekeurd pa hopi aña caba lo traha un hoya di
edificio nobo cu lo conta cu lift, suficiente espacio pa trahador y parlamentario y sigur lo
conta cu un sala moderno pa tene reunion y congreso. Tambe e edificio nobo lo disfruta
di un espacio moderno pa prensa y sigur lo bira e prome edificio di Gobierno cu lo haya
certificacion LEED pa uso di tecnologia moderno pa duna contenido na salud, eficiencia
y baha gasto y haci uso eficiente di energia pa garantisa sostenibilidad.
Kico falta?
E unico meta cu falta ta e ultimo parti di e puzzel cu ta e independisacion di parlamento.
Den e proceso aki combionan constitucional necesario ta na Directie Wetgeving en
Juridische Zaken hunto cu e Reglement van Orde nobo y nos ta en espera di revision di
esaki y asina por manda e cambionan Hulanda y atende e Reglement van Orde. Banda
di esaki e posicion di e trahadornan den e cambio ta na DRH pa revision di e
functieboek y e stapnan pa termina e independisacion di personal di parlamento. E
ultimo proyecto ta pa drecha e sala di parlamento cu camara mobilario nobo y sigui
percura pa yena e vacatura di promotie en voorlichting unda cu esaki tin di percura pa e
canal di television di parlamento por ser usa mas funcional pa yuda educa pueblo di e
rol y funcionamehto di Parlamento y sigur promoviendo eventonan educativo pa pueblo
en general.
Pa finalisa, mi por mira bek na 3 periodo hopi fructifero cu cambionan grandi y
necesario pa un desaroyo positivo pa Parlamento di Aruba. Tur e trabounan haci ta un
esfuerso di ekipo y mi kier gradici staff di Parlamento cu a uni nan mes na e vision y
meta y a brinda nan confiansa pa nos por logra esakinan.
