Gobierno y parlamento a keda sorprendi ayera mainta riba decision di SKOA riba e stapnan cu lo tuma. Parlamentario Shailiny Tromp – Lee ta presidente di comision di enseñansa y ta duna di conoce cu mainta tempran e la keda sorprendi riba e decision di SKOA y cu na e momento ey ainda parlamento y gobierno no tabata na altura di esaki.
Den un comunicado SKOA a duna di conoce cu e mester cubri gastonan y tambe un pochi di debenan cu tambe tin cu keda paga. Mesora a tuma contacto cu e directora di SKOA y e la duna di conoce cu un carta a keda manda na parlamento, pero cu den e oranan di mainta ainda ningun parlamentario y tampoco minister no a ricibi e carta aki, pero den oranan di atardi a ricibi e carta den e mail unda cu e carta a keda dirigi na tur e lider nan di fraccion.
E situacion aki ta trata di un disputa di basta tempo y cu ta canando di 2020. Aunke tin diferente puntonan cu ta canando entre gobierno y SKOA e parti di werkster a haya su atencion di minister actual di enseñansa. E werksternan ta esunnan cu ta mantene e scolnan di SKOA limpi unda cu ta percura pa e higiena na scolnan pa e luga ta un luga placentero pa tanto e maestronan y e muchanan por bay scol.
E carta di SKOA a lanta preocupacionnan mirando cu ta papia di aumentonan basta drastico. E parlamentario a sinta cu mediador di gobierno unda cu ya caba den pasado mediador tabata sinta na mesa cu partidonan esta gobierno , SEPPA y SKOA.
Na inicio di gobernacion minister a sinta cu SKOA y a lanta un comision pa bin cu un plan strategico y ayera e comision aki a duna e presentacion na e mandatario. Esaki ta pone cu minister di enseñansa lo mester bin den comision di enseñansa pa asina duna di conoce kico lo haci cu e situacion specifico aki di e werksternan.
Sinembargo e mandatario lo biaha awe y na momento cu e bin bek ta net den e siman pa entrega tur e preguntanan relaciona cu presupuesto di Aruba. Tur esaki mester keda cla pa asina keda entrega dia 21 di maart venidero. Asina a palabra cu dia 22 di Maart minister lo ta presente hunto cu e presidente di comision di enseñansa Shailiny Tromp -Lee pa presenta posibel solucionnan pa diferente problematica cu tin y principalmente e situacion di e werksternan.
Presidente di comision fiho di enseñansa ta duna di conoce cu for di su curason ta desea di mira un decision keda tuma unda cu partidonan ta contento cu ne y cu ta cumpli cu regla y ley y na mes momento derechonan di e trahadonan ta keda salvaguardia y cu e scolnan no ta keda perhudica.
E sumanan cu a keda menciona den e comunicado di SKOA ta spanta un y tur . Esunnan cu ta conoce mayoria di nos scolnan na Aruba sa tambe cu e suma actual mes hopi di nos mayornan no ta cumpli cu ne, esey ta pa diferente motibo sea cu nan no por of no a yega na areglo di pago, tin un grado di iresponsabilidad. Esaki ta e puntonan cu ta pone caba cu e mayor ya caba no ta cumpli.
Sinembargo no ta tur cos ta negativo, den tur e combersacionnan cu tabatin tanto e directora di SKOA , mediador, SEPPA y minister di enseñansa tur ta mira den e mes un direccion cu mester traha pa crea solucion, pero e biaha aki pa un solucion duradero. E situacion aki mester keda resolvi y no solamente pa tapa un buraco y despues di tres pa cuater luna e situacion ta dificil atrobe.
Lamentablemente den pasado un decision politico a ser tuma den gobierno di AVP. Prome cu 2015 werksternan ta cay bao di personal di sosten y ta keda paga bao di explotatie subsidie y esey no ta cay den salario manera cu e personal di enseñansa ta keda paga.
Na 2015 a keda dicidi otro caminda a saca e werksternan for di explotatie subsidie y pone nan den salaris subsidie y esaki ta bin cu ne, cu e werksternan ta haya derechonan tambe adicional. Esaki tabata un decision di gobierno di AVP e tempo ey. Na momento cu a haci e cambio specifico aki den diferente documentonan ta indica tin cu paga tino riba creamento di presedente , evalua bon na momento cu ta haci e cambio di hinca personal den salaris subsidie , otro fundacionnan no tin e trato igual aki, asina por keda menciona diferente aspectonan cu a bin padilanti.
AVP a crea e instabilidad aki na momento cu e tuma e decision politico aki y despues un otro decision politico a keda tuma na momento cu Minsiter Rudy Lampe a bira minister di enseñansa unda cu na 2020 kier a bira e decision di AVP bek.
Na momento cu e mandatario a tuma e decision politico aki e la trece hopi turbulencia y SKOA hunto cu e werksternan y SEPPA a hiba un lucha cu te ainda ta luchando riba e punto aki di decisionnan politico cu a keda tuma den pasado di tanto AVP y RED.
Presidente di comision di enseñansa Shailiny Tromp- Lee ta kere cu e werksternan nan funcion ta un funcion cardinal den e proceso di enseñansa, a duna nan cierto derechonan y no ta zomaar kier mira nan disparce. E parlamentario ta convenci cu si mester baha nan bek den e parti di explotatie kosten pa cu SKOA garga su responsabilidad e ora nan lo no por cumpli mas cu cierto beneficionan mas. Sinembargo decisionnan mester keda tuma riba e werksternan.
Tambe e otro aspecto ta e otro parti di debe cu SKOA ta keda menciona cu tambe ta un aspecto cu tin cu tene cuenta cu ne mirando cu ta indica cu nan no ta ricibiendo placa pero di otro banda si ta keda cobra e sumanan corespondiente.
Esaki ta un disputa cu tin ta andando y cu e parti aki tambe mester haya su atencion y trece un solucion pa e parti aki tambe. Awor minister di enseñansa Endy Croes a yega na un punto cu mester tuma un decision . Por a compronde cu minister di enseñansa cu e presentacion cu e la ricibi ayera di e comision di enseñansa a brinda perspectiva pa yega na solucion , pero awo a keda pa wak si esunnan envolvi ta diacuerdo y yega na otro y cu berdad ta yega na un solucion difinitivo.
Ya caba nos ta den luna di maart y ya caba e temporada pa inscribi muchanan na scol ta habri y mester tin un decision concreto di kico e schoolgeld lo bira pa cada mucha na Aruba. Segun presidente di comision di enseñansa, mas lihe tin un claridad mas lihe SKOA por reevalua e decision cu nan a tuma na e momentonan aki. Asina por bin bek un paz laboral pa e grupo di werksternan
