KRALENDIJK, Curacao
Raymond Gradus, presidente di e tres Colegionan di supervision financiero (Cft), recientemente a haci un bishita na Banco di Cuminda di Corsou (Voedselbank Curaçao). Ey el a haya informacion di e secretario di e Fundacion, Stacia Illidge, tocante e proposito di e iniciativa social aki, cu for di cuminsamento di e crisis di COVID-19 tur luna ta ofrece ayudo na miles di famia. For di april 2020 a parti mas di 40.000 pakete di cuminda. Tambe a inform’e tocante e donantenan, cualnan pa medio di nan contribucion financiero ta haci e forma di asistencia aki posibel, y e compromiso di tur e boluntarionan cu ta esforsa nan mes na diferente manera tur siman pa finalisa tur e trabounan.
Raymond Gradus ta haciendo un bishita informal na Corsou, unda durante un siman personalmente e ta tuma nota di e desaroyonan local y ta tene combersacion informal cu diferente instancia y persona. Originalmente e proposito tabata pa bishita tambe otro pais Caribense den Reino Hulandes, pero finalmente esey no a resulta posibel. E bishita regular di e Colegio den su totalidad na e paisnan, cu tabata programa pa juni, tambe a keda cancela; e siguiente biahe ta planea pa october.
