Riba djasabra 26 di òktober for di 19.00 or te 22.00 or nuebe habitante talentoso
di Boneiru ta duna presentashon di nan ‘spoken word’ ku nan mes a traha. E wéspet prinsipal
ta Ralph Winedt di Kòrsou. E partisipantenan ta presentá nan punto di bista personal i úniko
tokante libertat, i Winedt ta guia nan den esaki.
Ralph Winedt ta un nòmber establesé den paisahe literario di Kòrsou. No opstante su edat
hóben el a konkistá un posishon stabil den Kòrsou su sektor di arte i kultura. Komo artista di
palabra el a presentá riba tur podio importante na e isla ei. E mes tambe ta organisá evento
ku e kolektivo di eskritor ‘Carrying Narratives’.
E 10 ‘spoken word’-nan ta na papiamentu, ingles i hulandes. Miluska Hansen ta e maestro di
seremonia durante e anochi akí. E ta duna un tradukshon kòrtiku di e ‘spoken word’ si tin
hende den públiko ku no por sigui e vershon mas largu di e ‘spoken word’ den e otro idioma.
E presentashon di ‘spoken word’ akí ta tuma lugá den Parke Isidel. E organisadónan ta spera
ku e di dos presentashon akí, meskos ku esun anterior, lo lanta kuriosidat i interes di e
públiko. Nan ta spera tambe ku e presentashon lo tin un karakter íntimo ku espasio pa
profundisá mas den e ‘spoken word’.
E biaha akí tambe públiko por partisipá aktivamente. Tur hende por ehèmpel por skirbi un
frase i entregá esaki. Winedt ta konopá e frasenan na otro pa yega na e ‘spoken word’ di
mas largu di Boneiru tokante libertat. Banda di esaki tin dos aktuashon spesial i sorprendente
planiá. Bo ke sa kua? E ora ei reservá bo lugá rápidamente i bira testigu di un anochi
kaminda kreatividat i interakshon ta bini huntu.
Presentashon di ‘spoken word’ ta respirá e tema libertat na Boneiru
