Resientemente a tene un enkuentro di informashon ku instaladónan di koriente kaminda a introdusí i trata e kambionan i adaptashon di e manual nobo “Bonaire Elektrische Installaties Versie 2021”. Esaki tabata na enkargo di Direktorado di Supervishon i Mantenshon i Lei huntu ku WEB N.V. Na komienso di e enkuentro a tene un minüt di silensio pa asina duna honor na Sr. Harvey Bomba (q.e.p.d.) ku tabata un di e trèkdónan pa realisashon di e manual nobo “Bonaire Elektrische Installaties Versie 2021”.
Despues e enkuentro di informashon a kontinuá kaminda representantenan di Gobièrnu di Boneiru, WEB N.V. i Bonaire Utility Association (BUA) a hiba palabra. Di parti di Gobièrnu di Boneiru sr. Frensel Janga di e Servisio di Supervishon i Mantenshon di Lei a hiba palabra i a hasi un petishon na e instaladónan pa hasi uso di e manual mas tantu posibel pa asina inspekshon por tuma lugá mas lihé i efisiente. Tambe Sr. Frensel Janga a pidi e instaladónan pa profeshonalisá nan mes pa medio di hasi uso di e manual mas tantu posibel. Despues sr. Cedric Daal a dirigí su mes na e presentenan, kaminda el a pidi pa tur hende keda mantené nan mes na e palabrashonnan hasí.
Di parti di BUA a hiba palabra Sr. Leonard Sint Jago ku ta presidente di e asosashon. Sr. Leonard Sint Jago a boga pa sigui fortifiká e parti di komunikashon entre BUA, Gobièrnu di Boneiru i WEB N.V. Despues ku tur representante a hiba palabra e enkuentro a kontinuá i tabata Sr. Rupert Toré di Gobièrnu di Boneiru i Sr. Eduart Elisa di WEB N.V. ku a duna splikashon di e kambionan i adaptashonnan ku a hasi den e manual nobo “Bonaire Elektrische Installaties Versie 2021”. E enkuentro di informashon tabata hopi bon bishitá di parti di e instaladónan. Tabatin 21 instaladó i 10 representante.
Na final tur instaladó a haña oportunidat pa deliberá i hasi pregunta. Sr. Frensel Janga a gradisí e instaladónan i a yama nan danki pa a akudí na e enkuentro.
