Mundialmente prijsnan ta subiendo. Problemanan den e cadena di suministro di productonan, combina cu subida di costonan di energia tin un efecto grandi riba prijsnan. E subida di prijsnan ta traduci su mes den un tasa mas halto di inflacion. Den e cuadro aki, Minister Geoffrey Wever y Oficina Central di Estadistica (CBS) a organisa un presentacion riba e tema di inflacion.
Na e presentacion aki, cual a tuma lugar diahuebs 16 di december ultimo, tabata presente Minister Geoffrey Wever, sra. Mari-Lou Lejuez-Figaroa y sr. Giovanny Ridderstaat di Bureau di Minister Wever, sra. Jane Semeleer y sr. Giantcarlo Croes (Banco Central di aruba), sra. Ronella Tjin Asjoe-Croes (ATA), sra. Tisa LaSorte (AHATA)y sra. Maria Dijkhoff-Pita (DEACI).
Durante di e presentacion, CBS a duna un splicacion amplio di e proceduranan y e metodologia cu ta wordo usa pa e observacion di prijsnan y e calculacion di e Indice di Prijs di Consumo (CPI). E proceduranan y metodologia cu ta wordo usa ta cuadra cu e recomendacionnan cu Fondo Monetario Internacional (IMF) a emiti durante nan ultimo review di e CPI di Aruba cu a tuma lugar den luna di juli di 2020. E CPI ta wordo calcula tur luna y ta duna un bista di e desaroyo di prijsnan di productonan cu hogarnan na Aruba ta consumi. Pa e luna di november, e CPI a conoce un subida di 0.6% den comparacion cu e luna di oktober. Actualmente e tasa annual ta na 3.1%.
Pa sigui e desaroyo di prijsnan, personal di CBS ta monitorea e prijs di un lista constante di productonan na diferente establecimento na Aruba, incluyendo supermercadonan, restaurantnan (fast-food y full-service), lugarnan di bende paña, hardware stores y mucho mas. Pa luna, un averahe di 7.157 prijs di producto ta wordo monitorea.
Debi na e hecho cu casi tur producto cu ta wordo consumi na Aruba ta wordo importa for di otro paisnan, e subida di prijs di productonan riba mercado internacional, tin un efecto riba e prijs di productonan na Aruba. Esaki ta wordo refleha den e subida di e CPI. Na Hulanda, como tambe na Curaçao y islanan BES, por a wak cu e subida di prijsnan tabata relata tambe den gran parti na e subida di prijsnan di awa, coriente, gas, gasoline y diesel.
Na Aruba, e sector di transporte, cual ta inclui entre otro gasoline, diesel y compra di vehiculo, a conoce un aumento averahe di 7.3% entre november 2020 y november 2021, pero e prijs di awa, coriente y gas no a conoce un aumento. Pa e motibo aki, e prijsnan na Aruba no a conoce un desaroyo similar na e prijsnan na Hulanda, Curacao y e islanan BES.
E ta sumamente importante pa sigui monitorea e desaroyo di prijsnan na Aruba. Pa e motibo aki a concorda cu tur e partnernan cu tabata presente na e presentacion, cu lo sigui traha den un manera estrecho pa haya un bista detaya di e desaroyo di prijsnan na Aruba.