Despues di un presentacion na Almere (https://www.almeredezeweek.nl/nieuws/uit/57683/boekpresentatie-en-expositie-moederschap-in-cafe-op-2), awor ta toca turno na Amsterdam pa cu e presentacion itinerante di e buki artistico ‘Maternidad’ cu no ta solamente un buki cuatrilingual cu un oda na maternidad universal, sino tambe e aspiracion di e autornan Gustave Nouel (www.gustavenouel.nl) y Zuleika Coffie (https://www.imdb.com/name/nm3910548/?ref_=ext_shr) pa crea un brug entre e partinan Europeo y Caribense di Reino Hulandes y entre nan y resto di mundo den e sentido artistico di e palabra.
Diadomingo 26 di november for di tres’or y mei di atardi (15.30) lo tuma lugar presentacion di e buki ‘Maternidad’ na KIT Café Amsterdam na Linnaeusstraat 2 (den edificio di Museo Mundial di Amsterdam, antiguo Instituto Real Tropical). “Maternidad’ ta un buki cu pintura di Gustave Nouel y poesía cortico di Zuleika Coffie den e cuater idioma mas papia na Aruba (Papiamento, Hulandes, Ingles, Spaño). Tambe pinturanan cu a ser publica den e buki lo ser mustra. Un buki cu tambe por ta instrumental pa juda promove Papiamento. Señora Nuris Dabian, coördinadora di Bienestar y Cultura pa Aruba na Hulanda, a ser invita pa duna un discurso di apertura, representando Arubahuis/Aruba.
E siguiente presentacion ta planifica pa luna di maart di otro aña na Den Haag y for di mei 2024 lo tin un presentacion na Biblioteca Nacional Aruba (BNA) y despues na otro parti di Reino Hulandes den Caribe cu a mustra interes.
Ademas di presentacion di e buki, Zuleika Coffie y Gustave Nouel lo comparti nan expertise den forma di workshops.
