E preparashonnan pa konstrukshon di e Galileo Sensor Station (GSS) na Boneiru a ranka sali. Gezaghèber Edison Rijna a bai tira un bista na e lokalidat i e tim di eksperto di Agensia di Nabegashon Espasial Oropeo ESA i e Programa di Nabegashon Espasial Oropeo EUSPA a dun’é informashon amplio tokante e proyekto.
Aktualmente midimentu ta tuma lugá pa determiná e eksaktitut, disponibilidat i frekuensianan di interupshon na e lokalidat. Esaki ta nesesario pa kontinuá ku konstrukshon di e GSS ku ta bini riba tereno di WEB enfrente ‘1000 Steps’. Entrega di e stashon ta planiá pa luna di mart 2024.
Galileo ta e sistema sivil mundial di nabegashon via satélite di Union Oropeo i nan ta hasi uso di e sistema akí entre otro pa referensia di tempu i determinashon di sitio. Establesementu di e stashon akí na Boneiru ta di gran balor. E GSS ta ofresé vários posibilidat pa nos isla i entre otro pa empresarionan (ku ta kuminsando) den e sektor di teknologia.
