DCNA ta den preparashon pa organisá e Kids Edition (edishon pa mucha) di e Big Live Nature Quiz BLNQ. E wega online di pregunta i kontesta tokante naturalesa akí ta aksesibel pa tur alumno di skol básiko di grupo 7 i 8 na Karibe Hulandes. A krea BLNQ pa na un manera plasentero i interaktivo siña e alumnonan tokante naturalesa, hasi nan orguyoso di e bestianan di mondi na nos isla, apoyá pràktikanan ku ta bon pa naturalesa, sostené e proyektonan di e parkenan di naturalesa i trese nos muchanan di Karibe Hulandes den kontakto ku otro.
Riba djaweps 2 di novèmber 2023, for di 08.30 or te 09.15 or (AST), Dutch Caribbean Nature Alliance (DCNA) ta organisá e Big Live Nature Quiz Kids Edition, un evento fasinante i edukativo pa alumnonan di skol básiko na Aruba, Boneiru, Kòrsou, Saba, Sint Eustatius i Sint Maarten.
Detayenan di e evento
E edishon pa mucha di e Big Live Nature Quiz ta un wega online di pregunta i kontesta tokante naturalesa, ku DCNA ta organisá i ku skolnan básiko den área karibense ta hunga. E kues ta un berdadero prestashon di tim di vários isla: trahá i sostené pa e seis islanan di Karibe Hulandes, inkluyendo e organisashonnan di protekshon di naturalesa (e parkenan), skolnan básiko, Ministerio di Agrikultura, Naturalesa i Kalidat di Kuminda i Dutch Caribbean TV. Ta pone e preguntanan di e kues disponibel den 4 idioma: ingles, hulandes, papiamentu i papiamento.
Sugerensia i triki
E tema di e aña akí ta ‘Marino’, tur kos ku tin di haber ku oséano òf ku laman. Tur pregunta ta bini for di e di tres edishon di e revista BioNews di DCNA, di kua tin hardcopy na ingles, hulandes, papiamentu i papiamento disponibel pa tur skol. E preguntanan ta estilo ‘multiple choice’ i ta duna punto èkstra a base di velosidat. Studia e materia no ta obligatorio, pero den e lenk akí bou bo ta haña e lenknan pa bai na e vershon online di e revista.
E Big Live Nature Quiz pa mucha ta primintí di bira un eksperensia enrikesedor, kaminda ta kombiná pasamentu prèt i edukashon ku otro i kaminda ta promové amor pa naturalesa serka e mentenan hóben di Karibe Hulandes. E premio prinsipal ta un trep di snòrkel pa 4 persona rònt di nan isla. Lo tin otro premio lokal tambe disponibel.
Bo ke partisipá?
Partisipashon ta grátis, pero registrashon ta obligatorio. Dosentenan por registrá nan klas/grupo online: www.BigLiveNatureQuiz.org
