Den kuadro di ehekushon di e Lei di Finansa di e entidatnan públiko Boneiru, Sint Eustatius i
Saba (FINBES), konforme artíkulo 17, insiso 4, tur aña pa mas tardá dia 1 di sèptèmber
Kolegio Ehekutivo di entidat públiko Boneiru tin ku presentá e diseño di presupuesto pa e
aña presupuestal binidero na Konseho Insular. Den esaki mester indiká kon a tene kuenta ku
e konklushonnan i rekomendashonnan di Kolegio di Supervishon Finansiero (College
financieel toezicht – CFT).
Banda di esaki artíkulo 17 ta stipulá ku e diseño di presupuesto, huntu ku e otro
dokumentunan relevante manera menshoná den e promé i e di tres insiso di e artíkulo akí,
mester ta disponibel pa tur hende mira, asina ku a presentá esaki na Konseho Insular. E
dokumentunan akí mester ta generalmente optenibel tambe, i públikamente mester pone
na konosementu ku nan ta disponibel pa tur hende mira i ku nan ta generalmente optenibel.
Sinembargo te ku awe nos no por a tira bista den konseho di CFT, i tampoko den e manera
ku Kolegio Ehekutivo a prosesá e konseho akí den e diseño di presupuesto pa aña 2025. Mas
aleu nos ta ripará ku den e diseño di presupuesto ta hasi menshon di vários rapòrt ku no a
keda añadí na e publikashon. Ta trata akí di dokumentunan ku ta esensial pa por komprendé
e añadishon struktural di un suma di $ 11.553.000 di kompensashon liber na presupuesto di
entidat públiko Boneiru, esta: e investigashon di Ideeversa, oumento di e sueldo mínimo
legal (wettelijk minimumloon – WML), e palabrashonnan di cao ku RCN, i e indeksashon di
BBP pa aña 2024.
Komo tata i protektor di bon gobernashon i gobernashon transparente, nos ke pone bo na
altura di nos preokupashonnan tokante e proseso relashoná ku tratamentu di presupuesto
2025. Segun nos opinion, a aktua en pugna ku e artíkulonan 17 te ku 19 di FINBES.
Pagina 2/2
Pa motibu ku no a pone tur dokumentu relevante pa tur hende mira, no tabata posibel pa
nos pueblo por a haña konosementu kompleto di e presupuesto.
Promé ku kontinuá ku tratamentu di e presupuesto den e komishonnan, nos ta supliká bo pa
entregá e siguiente dokumentunan i hasi nan públiko, pa di e manera ei salbaguardiá
partisipashon demókratiko di nos pueblo.
⁃ Konseho di Kolegio di Supervishon Finansiero (CFT);
⁃ Reakshon di Kolegio Ehekutivo riba konseho di CFT;
⁃ E rapòrt di investigashon di Ideeversa;
⁃ E dokumentunan relashoná ku oumento di Sueldo Mínimo Legal (WML);
⁃ E dokumentunan relashoná ku e palabrashonnan di cao ku RCN i e indeksashon di
BBP;
⁃ E fecha riba kua konforme artíkulo 17, insiso 5, ta pone tur dokumentu disponibel pa
tur hende mira, inkluso e notifikashon públiko di esaki.
Kordialmente nos ta supliká bo pa entregá e informashon akí na tempu, di manera ku e
desaroyo mas aleu di e proseso di presupuesto por tuma lugá konforme legislashon i
regulashon vigente.
