Cu sosten grandi di publico general
16 di october ultimo, durante e programa “Na drempel di fin di aña” di Erin Croes, Fundacion Go Cultura a anuncia cu e proximo baluarte cultural cu lo ricibi e premio nacional Crioyo di Oro lo ta Robert Jeand’or.
Premio Crioyo di Oro ta un reconocemento cu a nace na 2021 como un “lifetime achievement award” pa reconoce, balora y celebra excelencia artistico y personanan den nos cumindad cu a dedica nan bida largo na desaroyo cultural di Aruba. E reconocemento aki ta wordo entrega durante un anochi di gala cu ta wordo combina cu un gran concierto como homenahe na esun cu ta ricibi e premio.
Nos por corda e homenahe dedica na Jossy Brokke den luna di december di aña 2021, caminda cu Fundacion Go Cultura a sorprende Jossy cu e premio aki y a nombra Jossy Brokke como Aruba su prome recipiente di Premio Crioyo di Oro. Despues di e exito grandi aki, Fundacion Go Cultura a dicidi cu lo continua cu e proyecto aki, considerando cuanto baluarte nos isla tin cu merece di wordo reconoci y homenahea di e forma aki, y tanten cu nan ta na bida.
Locual a bira diferente na 2022 ta, cu e aña ey a duna publico general e oportunidad via e plataforma digital pa nomina e persona cu nan ta desea pa ricibi e premio nacional aki. Despues di mas cu mil nominacion, cual Fundacion Go Cultura a considera como un reaccion y cantidad fantastico, por a nota cu un cantidad abrumador a nomina Maybelline Arends-Croes como e proximo persona pa ricibi e premio aki. Maybelline a ricibi e premio nacional aki durante un homenahe musical fantastico den Cas di Cultura.
Pa aña 2023, un bes mas tabata tin e oportunidad pa publico general por nomina nan faborito. Cu 700 nominacion mas cu aña 2022, fundacion Go Cultura a keda hopi agradecido cu e iniciativa aki ta biba den nos comunidad. E gran mayoria a nomina Robert Jeand’or como e ganador pa 2023 di e premio nacional aki. Robert Jeand’or ta wordo considera como un di e artistanan y baluartenan cultural di mas importante, emblematico y legendario di henter nos historia como isla y como pais.
Na su 69 aña di edad actualmente, nos por mira atras riba un carera y trayectoria impresionante di Robert como cantante, musico, areglista, productor y ciudadano arubano activo, ehemplar y productivo.
Loke nos por anticipa ta cu e homenahe di gala cu Robert lo ricibi dia prome di december proximo ta inclui un concierto musical carga pa un elenco impresionante di streanan briyante di e mundo musical di nos pais manera Rocco Franken, Noush, Jeffrey Kelly, Rachel Kraaijvanger, Jack Tromp, Julisa Arends, Danny Koolman, Jonathan Croes, Edjean Semeleer y hopi sorpresa mas.
E lo bira un biahe den Robert su carera musical desde su inicio te cu actualidad.
E artistanan cu lo ta parti di e anochi aki lo presenta Robert su exitonan musical y celebra hunto cu Robert, un bida excepcional di musica, inspiracion y alegria, cu sigur lo sirbi como inspiracion y herencia pa futuro generacionnan.
Fundacion Go Cultura ta gradici comunidad Arubano inmensamente pa a participa den e proceso di nominacion pa e proximo Crioyo di Oro.
Cu esaki Fundacion Go Cultura ta haya un bista mas cla, cua ta e personanan talentoso y creativo cu nos comunidad mes ta stima, respeta, aprecia, apoya y balora. Esaki ta duna nos fundacion mas animo pa sigui traha y purba reconoce personanan cu berdaderamente a duna di nan parti pa impacta, inspira, motiva, alegra, empodera y eleva e ser humano. Nan storia merece di wordo conta y nan aporte merece di wordo balora y reconoci di e mihor forma posibel.
Gradicimento tambe na Gobierno di Aruba, UNOCA, Departamento di Cultura, SETAR, Aruba Airport Authority, Clickprint, Bodegas Papiamento, Artopia y Papiamento Restaurant pa nan sosten y aliansa sumamente valioso.
Pa caarchi na balor di 50 Florin, por pasa na Fantastic Gardens na Bushiri.
Pa reserva entrada pa e anochi magnifico di 1 di december, por comunica a traves di email: info@Gocultura.org of via Whatsapp: 5695442.
Keda pendiente pa mas detaye di “Premio nacional Crioyo di Oro, un Homenahe na Robert Jeand’or” den Renaissance Convention Center.
