Durante di reunion di Parlamento pa trata e Nota di Fin di Aña 2022 (Najaarsnota 2022), Prome Minister Evelyn Wever – Croes a duna informacion y contesta preguntanan relaciona cu desaroyo na San Nicolas.
Iluminacion na San Nicolas
E situacion cu falta di iluminacion na San Nicolas, ta un problema cu te ainda no tabata facil pa soluciona, Prome Minister Wever – Croes a splica. A logra pa ‘aki aya’ soluciona e problema cu tin, pero aworaki ta bay pasa esaki pa Utilities pa asina Elmar por encarga cu ne. Un di e retonan sigur ta falta di fondo pa logra un solucion duradero, pa motibo cu mester a corta den gasto di operacion di Gobierno.
Ta importante pa comunidad realisa cu reduccion di gasto di operacion ta nifica corta den inversionnan. Prome Minister Wever – Croes a splica cu Elmar a priminti cu nan ta finalisando e ‘business mode’l pa por tuma over esakinan. Elmar lo cuminsa cu e areanan Bernhardstraat y Mainstreet poniendo luznan cu nan mes por traha cu ne.
Hotel San Nicolas
Pa locual ta e Hotel Secrets Baby Beach Aruba, Premier Wever – Croes a splica cu e desaroyadornan mester a para e fabricacion di e structura di ‘staal’ cu tabata andando pa motibo di caso den corte. Sinembargo despues di e ultimo veredicto di huez cu nan por a sigui, no por a djis cuminsa bek pa motibo di cierto planificacion y pues mester a warda un tempo atrobe. A compronde cu aworaki si nan ta bezig cu e fabricacion di staal un bes mas, pa asina nan por continua cu e trabounan.
Pa loke ta e hotel na Ex Esso Club, Colega Minister Oduber a indica cu e proyecto ta den proceso di ‘optie’ y durante di esaki mester cumpli cu cierto rekisitonan. Ta siguiendo e desaroyonan di cerca pa sigura cu e ta bira un proyecto bunita y exitoso.
Carnaval Village
Por ultimo, un otro tema cu Prome Minister a ricibi pregunta di dje ta trata Carnival Village. Den cuadro di esaki, Premier Wever – Croes a pidi pa e plannan cu a wordo traha tempo cu a diseña Carnival Village pa mira kico tabata e intencion, comparti cu Parlamento y mira unda por mehora pa e por sirbi su proposito. Ta e intencion pa construi un podium bastante amplio na Carnival Village, pero esaki no a tuma luga ainda pa motibo di falta di fondo.
Prome Minister a finalisa sigurando cu tin atencion na e proyecto aki menciona, y na tur e otro proyectonan andando na San Nicolas.