E aña aki ta casi tras di lomba, el a siña nos cosnan bon y cosnan menos bon. Principalmente, e la siña nos cu nos mester di otro y cu HUNTO nos ta logra hopi mas.
Aña 2020 a cuminsa bon. E lo tawata e prome aña cu un surplus financiero den nos presupuesto. Resultado di trabou duro di nos Minister di Finansa y su ekipo, y sacrificio di henter nos país. E tawata e aña cu nos lo a inverti den scolnan nobo, den vivienda social, den casnan pa cuido di nos grandinan. E tawata e aña cu nos lo a mira resultado positivo di e maneho cu nos a bin ta implementa desde november 2017 ora mi a huramenta como Prome Minister, den cual nos a pone e ser humano central.
Sinembargo 13 di maart tur cos a cambia momento cu na Aruba Covid a bati na nos porta. Un crisis mundial cu a cuminsa den paisnan grandi a yega nos islã. Pero nos Arubianonan a demostra curashi pa enfrent’e.
Crisis Team cu ta consisti di nos Arubianonan profesional a sa di bin hunto y guia Gobierno di Aruba na controla e virus na un manera hopi eficiente, unda cu paisnan grandi tawata kibra cabes pa tene e casonan bou control, mas tanto cu ta posibel. Nos no a gana e batalla ainda. E retonan ta bira cada biaha mas gradi, pero nos tin awor mas conocemento y mas experiencia pa enfrenta e retonan.
E ventaha tawata cu nos tawata bon prepara, y pa esaki nos ta agradecido na e vision di nos Minister di Salubridad.
Nos polisnan a mustra nan capacidad di enfrenta e crisis cu medidanan no popular pero si eficiente. Bou guia di Minister di Husticia nos Frontliners a traha oranan largo pa scapa bidanan den nos pais.
Gobierno di Aruba no a ria pa bini cu un maneho pa evita retironan masal, Minister di finansa a bin cu loonsubsidie, pa yuda empresanan mantene e trahadonan na trabou, y Minister di Asunto Social y Labor a anuncia FASE, cu ta un sosten financiero pa esnan cu asina mes a perde trabou. Minister di Finansa y Economia a anuncia tambe e sosten di 4000 florin pa kwartaal pa empresanan mediano y chikito. Y tambe e alivio fiscal pa alivia costo di vida di nos ciudadanonan, rebahando tarifa di impuesto riba salario cu 2%. Pa stimula economía a reduci impuesto riba importacion di material di construccion cu 2%. Tur esaki pa evita lo peor, pa evita cu hopi hende lo a perde trabou, pa evita cu companianan ta cera. Nos isla chikito cu a haya un sla duro door di a cera su frontera, a sa di sali y purba yuda su pueblo.
Aruba a sa di bini hunto y yuda un otro cu ta pasando den momentonan dificil.
Nos ciudadanonan a sa di ta solidario boluntariamente, entregando parti di nan salario pa yuda otro, pa yuda un otro cu a perde tur cos. Algun no tabata contento pero mayoria a compronde cu e tawata lo corecto.
Nos Minister di Agricultura a curasha nos pueblo pa bay planta, hunto cu Minister di Infrastructura a entrega terenonan pa sigui conscientisa, pasobra un cos cu e pandemia a siña nos ta cu nos no por depende di nada mas cu importacion.
Mas di 125 persona, boluntariamente, a traha den diferente taskforce pa inventarisa e problemanan cu nos pais ta enfrenta, revisa raportnan traha anteriormente, y presenta solucionnan pa tur e problemanan. E masterplan ta stipula e rumbo nobo cu nos como pais mester tuma, pa crea un Aruba mas fuerte y resiliente.
Como Minister encarga cu telecomunicacion, el’a percura tambe pa mas tanto posible nos scolnan y departamentonan publico tabata tin internet pa e comunicacion por a sigui virtual apesar di toque de queda y shelter in place.
Minister di Enseñansa a duna mayornan mas opcion den scoge un scol normal of “online learning” e manera cu nan ta sinti nan mes mas comfortabel pa nan yiu sigui haya enseñansa. Laga nos felicita tur scol, cada maestro na Aruba, cu apesar di tur cos a mantene nos yiunan “safe”.
Na e mes un momento nos Minister di Turismo tawata determina pa habri nos frontera bek, unda a inverti den tur posibilidad pa tene tur hende “safe”, cu ayudo semper di nos mesun hendenan, y asina Aruba a habri gradualmente pa practicamente henter mundo.
Turistanan cu a tuma hopi riesgo a bini bek Aruba y disfruta di nos beachnan, di cordialidad di nos hendenan amabel cu a pone nan cada uno sinti sigur den un pandemia mundial. Y asina, un a sigui invita otro pa bini Aruba hibando e siguransa cu Aruba ta safe.
E hecho cu awe nos tin poco mas libertad cu demas paisnan den nos region, y cu toch nos si por a celebra Pasco y aña nobo, maske poco diferente, no ta pa casualidad. Ta danki na e trabou duro di nos profesionalnan, cu dia aden y dia afo a traha pa cuida salud di otro of pa mantene orden publico. Y ta danki na sacrificionan grandi cu nos cada un a haci.
Nos a sacrifica nos libertad durante toque de queda y shelter in palce. Nos a cera scolnan. Nos a cera frontera, cu a pone cu famianan a wordo separa sin sa ki día nan ta mira nan famia atrobe cu ta biba den exterior, sin sa ki día nos por bolbe brasa nos yiunan cu ta biba den exterior.
No ban perde tur e trabou duro y sacrificionan grandi cu nos a haci pa un descuido den e dianan di fiesta aki. Nos mester sigui cuida nos mes, y nos famia, especialmente den e dianana aki.
Aña 2020 a siña nos dedica mas tempo na nos famia, proteha nos grandinan, traha un termo di te di moringa pa un bisiña of un conoci cu ta malo, hiba un weya di sopi pa nan haya forsa y resa pa un enfermo cu bo ni conoce.
E aña aki maske nos no por a brasa, duna man ni sunchi, tawata e aña cu mas nos a bini hunto pa contribui na nos pais, ARUBA !
Como Prome Minister di Aruba e momentonan aki a duna mi animo, curashi, determinacion pa sigui lucha pa nos Pueblo.
Nos ta cera e aña unda nos a siña asina hopi. Nos a siña cu pidi ayudo no ta señal di debilidad sino un señal di forsa. E ta señal con hopi nos ta stima Aruba. Un señal cu HUNTO nos por hopi mas!
Cu perspectiva pa 2021, hunto nos lo mester sigui hiba e pais aki na un otro nivel, unda nos no lo keda depende di turismo so, pasobra esey 2020 a siña nos.
Manera un mata di fruta cu ta ser planta, e lo duna fruta despues, cu positivismo y determinacion nos ta drenta 2021.
Cu Inversionistanan den un pandemia tin un interes grandi den nos isla ainda, nos mester duna nan e oportunidad berdadero. Inversionistanan cla pa purba diversifica nos economia cu apoyo total di Gabinete Wever-Croes, unda hopi a purba y no a logra. Ta keda awo na nos tur pa logra, nos no por warda mas.
Mi kier a yama danki, danki na Aruba, na cada ciudadano cu ta mi inspiracion pa lanta tur mainta mas determina cu nunca pa traha pa nos baranca cu ni Covid-19 a logra kibra.
Mi kier pidi boso cada un pa hunto nos drenta 2021 cu un mesun meta, pa Aruba. Pa Hunto nos para fuerte pa tur reto y transforma nan den oportunidadnan nobo. Pasobra aña 2021 lo ta un miho aña.
Pa un economia mas fuerte, un autonomia mas fuerte pa y un Aruba Fuerte.
Ban sigui e movicion cu pasonan fuerte, pa desaroyo di pais Aruba!
Den nomber di mi famia, y den nomber di tur e ministernan di Gabinete Wever-Croes, mi ta desea bo un bon cambio di aña. Cu aña 2021 trece hopi prosperidad, felicidad y principalmente salud pa bo y bo famia. Y cu Dios bendiciona cada ciudadano di nos país.
Un bon aña 2021