Kralendijk – Niun hende no ta bai paga niun sèn extra pa awa di bebe debí na e ordenansa di kobransa di awa di berpùt 2021. Asina diputado Nina den Heyer a deklará den Konseho Insular.
Historia.
Na aña 2010 gobièrnu di Boneiru a bai di akuerdo ku e konstrukshon di e planta di kloaka. Pa esaki nos a haña supsidio di Union Europeo i el a wòrdu konstruí dor di Sona. Konstrukshon no a bai manera premirá pero danki na WEB e servisio di resiklahe di awa ta eksistí desde 2014/2015. Ora kualke hende na Boneiru, sea na Rincon òf na Tera Korá, pidi un trùk di kloaka bin chupa e sceptic tank of berpùt, e trùk ei ta hiba e awa sushi na e planta di resiklahe. E servisio ei ta funshoná bon pa kual motibu pa 5 aña kaba e awa sushi aki no ta keda di dùmp unda ku ta. Lokual lo a i ta afektá nos koralnan. A konsekuensia, ta mantené e poblashon di peska mas mihó posibel pa nos piskadónan.
Pa e hotèlnan òf kasnan ku ta mas kantu di kosta i ku no tin sceptic tank, tin un pòmp ku ta chupa e awa di riol outomátikamente mand’é pa e planta di resiklahe pa keda resiklá. E servisio aki tambe ta drai 5 aña kaba. Ta bon pa enfatisá ku ni pa transporte di awa di riol via e infrastruktura, ni pa resiklahe di tur hende su awa, te ku awor no mester a paga nada. Pa 5 aña e servisio tabata kompletamente grátis i ministerionan tabata supsidiá e servisio aki sea por kompleto òf parsialmente. Den e akuerdo di 2010, Bonaire a primintí pa entre otro, pasa un ordenansa kaminda e siudadano di Bonaire ta kontribuí ku un parti di e kostonan di e servisio aki via un impuesto. No tur subsidio ta desaparesé pero via e verordening/impuesto aki lo mester kontribuí (40%) ku e kostonan.
KE a aktua responsabel pa saka lo miho for di e deal existente
E deadline pa introdukshon di e impuesto a yega. Kolegio Ehekutivo tin ku kumpli ku promesanan hasi den pasado. A traha duru pa tin lo mas posibel en kambio di esaki. Por ehèmpel
- a bini kontribushon finansiero pa kaba e proyekto i e gran parti di esei a bolbe bini for di Hulanda. WEB ta trahando riba e partinan aki manera nos por wak na kaminda di Belnem pero tambe pronto direkshon di Hato.
- Tambe nos a papia riba eksplotashon i supsidio di e planta di kloaka ya ku ministerionan a kuminsá baha nan kontribushon. Hinkando WEB den un situashon ku mester supsidiá esei for di fondonan di awa i koriente …. di mes esei NO POR. E ta trese WEB tambe den un situashon di default pa ku su responsabilidatnan finansiero. BC a negoshá ku Hulanda pa mantené un mínimo di supsidio di Euro 1 mion pa aña.
- Pero tambe pa yuda den e promé 4 añanan extra pa trese e sistema na un mihó nivel pa por sigui kontinuá ku e servisio na un manera responsabel.
Ku otro palabra, no ta introdusí impuesto sin ku e pueblo ta garantisá di haña algu bèk. Ademas e pueblo no ta paga pa e eksplotashon kompleto i e supsidio ta sigui bini.
Nos ta papiando di un supsidio di un total di USD 10.5 mion den añanan te ku 2026. En kambio di esei mester kumpli ku palabrashon di 2010 pa introdusí e verordening pa e resto dje suma … si no e supsidio ta disparsé.
Introdukshon dje impuesto i impakto real
Niun hende, i ami sigur, no ke extra impuesto. Pero kumpliendo ku deber i BC nos mester a deliberá tokante e manera pa introdusí e verordening, nos ta tin algun opshon. Den esei BC su focus tabata pa introdusí un manera pa e persona ku e potmoni mas chiki ta wordu influensha menos of no ta wordu influensha at all. Pa esei varios kos a wordu hasí. Permitimi splika.
E prome kos ta kon pa introdusí e 40% di e kostonan den komunidat. Awor BC ta tin tres opshon:
– Nos ta dividí e kostonan riba tur kas. Pero di mes esaki no ta hustu pasó tin kaminda (manera hotelnan) ku ta produsí mas awa di kloaka i ta usa mas di e sistema di resiklahe. En kambio den un kaso asina e kas chikitu ku ta usa menos ta haña un impuesto impagabel.
– Un di dos opshon lo tabata pa hasi un divishon pa sektor. Esaki ta zona bunita pero no por ehekuté. Por ehèmpel e no ta kai bon serka e ‘bed and breakfast’ i apartamentonan chikí. Ademas e kostonan di atministrashon di esaki lo bini aserka i hasi hinter e impuesto mas karu. No ta un kos ku por a ehekutá fasil.
– E di tres opshon ta e prinsipio di ’de vervuiler betaalt.’ E idea ta ku un hotèl ta produsí mas awa sushi i lo mester paga mas na e servisio ku un famia ku ta usa awa na un manera efisiente. Mas uso bo usa mas impuesto bo ta paga. Niun sistema no ta perfekto pero e repartishon ku ta aproksimá esaki di mas honesto ta e uso di awa.
Konklushon: No ta e awa ta bira mas karu. E kuenta di awa ta keda mesun kos. Ta usa e kuenta di awa pa un repartishon di gastu na un manera hustu. Esun ku ta usa mas, manera e hotèlnan, ta paga mas.
E impakto lo ta:
66% di nos poblashon ta usa ménos pues e impakto lo ta ménos tambe.
Pa lokual ta e tarifa fiho pa esnan ku ta konektá na e infrastruktura di riol (por ehèmpel un apartamento na Boulevard), ta solamente hustu pa nan paga nan parti pa un servisio ku nan ta hasi uso grátis di dje pa 5 aña kaba. Si bo ta biba na Republiek, mester paga e trùk di Kloaka pa bin hasi bo sceptic tank bashi. Esei no mester ora bo ta konektá.Dus no ta nada mas ku hustu pa nan paga na parti den esaki, ku ta 25 usd pa luna. Mirando ku nan ta paga nan parti pa e infrastruktura ku nan so ta usa, por a mantené e impuesto variabel tambe mas abou.
No mester hasi manera ta hinter Bonaire ta bai paga esei.
Pakiko nos ta hasi esaki
Laga nos tur korda un biaha mas pakiko nos ta hasi esaki. Den COVID nos a ripará realmente kwantu impakto turismo tin riba nos ekonomía i tambe entrada di nos hendenan. E turismo di kalidat ta valorá e koraal i piská fresku ku e por kome i ta p’esei e ta bini Bonaire. Dor di kuida nos koral i peska nos ta sigurá entrada di kada un persona aki na Bonaire.
E liñanan di irigashon tambe a drecha a base di e palabrashonnan ku Hulanda, tin mas mihó distribushon di awa i tambe pa LVV. Nos tur ta papia semper di ‘zelfredzaamheid’. Nos por wak LVV awor, ta promé biaha ku esaki ta berdaderamente efektuá. Tin awa di irigashon, tin e oprtunidat awor pa kumpra berehein, guiambo i kònkòmber chikí na LVV na un preis di baka flaku. I ademas por ekspandé e aktividat einan dunando kunukeronan un oportunidat real pa hasi e negoshi eksitoso. Tin mas trayekto ku komo BC nos ta traha riba dje pa ku esaki. Tene na kuenta ku nos ta traha ku un vishon ku ta sostenibel i no een-dags-vlieg pa popularidat polítiko den término korto.
Nos den gobièrnu mester kumpli ku akuerdonan ku gobièrnu di Bonaire a sera den pasado. Esei ta kontinuidat di maneho (continuiteit van bestuur) ku ta parti di un gobièrnu responsabel. Lo ta bon pa tur hende ku kurason pa Bonaire sigui e prinsipio aki.
Nos a purba di wak kon por introdusí e situashon aki na un manera mas honesto i sosial posibel. Miéntras di esei nos ta purba saka e benefisio pa e mes pueblo aki por tin:
Su trabou sostenibel
Su peska sostenibel
Su agrikultura sostenibel
Su salú sostenibel.
Den e verordening tin tambe un ‘flankerend beleid’. Ta algu ku personalmente mi a sigurá pa tei den e ‘verordening’. Pa esun ku nos por konstatá ku e ta echt difísil pa paga, lo tin ‘flankerend beleid’ pa supsidiá e kostonan. E aña ku ta bini NO tin kosto adishonal pa NIUN hende. Nos lo sigui fine tune pa e añanan siguiente kon pa kobra e impuesto i kon pa apliká e yudansa pa esunnan de ménos rekurso den nos komunidat.
