Último dianan na múltiple okashon a bini dilanti den medionan di komunikashon kon wes a kondená diputado C. Abraham pa motibu di no a kumpli òf no a kumpli kompletamente ku obligashonnan komersial ku e tabatin ku Fundashon Mariadal. Riba esaki ta bini tambe e echo ku diputado C. Abraham ta hasi negoshi pa medio di un empresa ku no ta registrá na Kámara di Komèrsio Boneiru, ni na Servisio di Impuesto di Boneiru. Ku esaki den un forma grave diputado C. Abraham ta hasi su mes kulpabel na aktuashon no-íntegro. Esaki ta un violashon fuerte di e eksigensianan di integridat ku ser un mandatario komo miembro di Kolegio Ehekutivo ta trese kuné.
A base di loke nos a menshoná akí riba, gustosamente nos ke dirigí e siguiente preguntanan na gezaghèber interino R. Oleana:
1. Sr Oleana a tuma nota di e veredikto i e informenan den medionan di komunikashon tokante esaki, kaminda wes a kondená sr C. Abraham pa paga bèk e suma ku den forma ilísito el a fakturá Fundashon Mariadal pa artíkulonan ku e no a entregá?
2. Sr Oleana ta kompartí e opinion ku kondena di sr C. Abraham, ku al fin al kabo no ta solamente un ‘empresario’, pero tambe un polítiko prominente – den e kaso akí diputado i lider di un partido ku ta den gobernashon – ta dañino pa reputashon di entidat públiko Boneiru i pa e konfiansa di komunidat den gobernashon, pero tambe tin efekto negativo na ‘politiek Den Haag’?
3. Sr C. Abraham a tene sr Oleana na altura durante henter e proseso dilanti di wes? Si e kontesta ta afirmativo: ki paso sr Oleana a tuma pa mas tantu posibel limitá e daño di reputashon ku por a verwagt? Si e kontesta ta negativo: dikon nò?
4. Sr Oleana ta di akuerdo ku nos frakshon ku di un miembro di Kolegio Ehekutivo por verwagt ku e ta aktua den un forma finansieramente íntegro, tambe komo suidadano i empresario?
5. Den lus di integridat finansiero e veredikto ta lanta algun pregunta agudo. Sr Oleana a puntra sr C. Abraham dikon el a laga aparesé ku e ta un empresario ku un empresa ku, segun wes, no ta registrá ningun kaminda i por lo tanto – por ehèmpel – no ta disponé di un ‘cribnummer’ tampoko? Sr Oleana a puntra sr C. Abraham si el a paga i den ki forma el a paga e ABB ku ta legalmente obligatorio? Sr Oleana a puntra sr C. Abraham si el a hasi notifikashon na Servisio di Impuesto (Belastingdienst) di e suma ku el a risibí i den ki forma el a hasi esaki? Si sr Oleana no a hasi e preguntanan akí na sr C. Abraham, sr Oleana ta dispuesto pa hasi esaki ainda i informá Konseho Insular tokante e resultado?
6. Sr Oleana ta di opinion ku por spera di un miembro di Kolegio Ehekutivo ku komo suidadano, o sea empresario, e tambe ta respetá nos estado di derecho? Den e konteksto akí, kon sr Oleana ta husga e echo ku sr C. Abraham a opstakulisá prosedimentu hurídiko pa medio di na asta dos okashon neglishá un sitashon di wes i ku esaki a nenga di kontestá preguntanan di wes?
7. Enfrente medionan di komunikashon sr C. Abraham a alegá ku e proseso kontra dje tin un motivashon polítiko. Sr Oleana tin kualke indikashon ku e alegashon akí tin kualke base pa ta bèrdat?
8. Sr Oleana ta dispuesto pa (laga) hasi investigashon pa loke ta trata e señalnan for di den komunidat tokante similar insidentenan kaminda tambe e kondenado lo ta enbolbí?
9. Kua ta e pasonan ku sr Oleana ta bai tuma pa rekuperá e daño ku sr C. Abraham a okashoná na e konfiansa den gobernashon?
10. Sr Oleana ta haña ku sinta den reunion ku un miembro di Kolegio Ehekutivo ku a faya gravemente ku integridat no ta tacha kredibilidat di Kolegio Ehekutivo den su totalidat? Si e kontesta ta negativo, dikon nò? Si e kontesta ta afirmativo, kiko ta bai hasi ku e situashon ku a presentá?
11. Kua ta e instrumentunan ku sr Oleana den funshon di protektor di bon gobernashon tin na sr Oleana su disponibilidat pa aktua den kasonan di e índole akí? Sr Oleana a hasi uso di esakinan òf sr Oleana tin pensá di hasi uso di esakinan? Si e kontesta ta negativo, dikon nò? Si e kontesta ta afirmativo, ki dia Konseho Insular por risibí un informe tokante e pasonan ku a tuma?
