Den forma inprecedente Directiva di SKOA diamars atardi a dicidi du maestronan cu ta traha pa e fundacion aki, tin cu presenta na nan respectivo scolnan pero cu e scolnan ta keda cera pa alumnonan.
Segun un comunicado cortico di SKOA, esaki ta pa demostra nan solidarismo cu werksternan cu a wordo manda cas riba orden di Minister demisionario Rudy Lampe, pa motibo cu segun e mandatario, SKOA den forma incorecto y ilegal, ta pagando e hendenan di servicio di limpiesa for di un fondo cu no ta destina pa esaki.
E conflicto aki tin algun luna caba andando entre Minister Lampe y directiva di SKOA caminda entre otro e mandatario a acusa e fundacion di ta atraca caha di pueblo cu e forma di procede aki mientras cu den Corte caba SKOA a wordo mustra cu loke nan ta haciendo no ta corecto.
Awor cu gobierno a permiti scolnan habri bek riba prome di September directiva di SKOA a dicidi di bay hunga un tipo di powerplay apesar cu e fundacion a perde dos caso caba den Corte y awor cu e conflicto cu Minister Lampe a yega e nivel aki, ta mira den direccion di Gobierno y Prome Minister Evelyn Wever Croes pa soluciona esaki.
E powerplay di SKOA di no habri su scolnan ayera mainta, a perhudica no solamente e alumnonan pero mayornan tambe cu a haci tur preparacion necesario pa e dia aki pero na ultimo ora a bin haya nan mes ta buscando otro solucionnan pa asina atende cu nan yiunan.
Simplemente SKOA no tin hustificacion pa e accion aki cu por wordo considera un accion ilegal cu por tin su consecuencianan serio cune y ta lanta e pregunta si Obispado na Willemstad lo ta sostene e accion descabeya y iresponsabel aki.
Loke e directiva tin cu haci ta di sinta na mesa cu Minister Lampe manera Prome Minister a mustra den su reaccion riba e accion aki pero no por ta asina cu minister di enseñansa kende hasta a entrega un keho na Ministerio Publico contra di SKOA pa malversacion di fondo publico, anto awor directiva di SKOA ta dicidi di abusa di confiansa di mayornan di nan alumnonan c’un accion cu simplemente no por wordo hustifica, ni legalmente ni socialmente.
Muchanan mester a drenta scol for di algun siman pasa caba pero dor di argumento di contagio den casonan di covid 19, gobierno a dicidi como parti di e maneho pa baha e cantidad di casonan, cu scolnan lo habri dia prome di september.
Tabata dos siman cu SKOA por a atende cu e asunto aki pero a prefera di intenta un tipo di p powerplay caminda en realidad e uniconan cu ta wordo perhudica, ta e alumnonan y nan famia y awor tin cu mira si e accion aki lo por tin cu consecuencianan legal contra di e directiva di e fundacion.
