Despues cu 25 di juni ultimo pueblo a bay urna electoral pa asina escoge su representantenan den parlamento, nos ta para atrobe na un crusada caminda un bes mas e integridad di nos sistema democratico ta ser midi. Den e periodo tras di lomba nos a mira cu na varios manera a purba atacha e credibilidad y transparencia di e proceso electoral. E eleccion tras di lomba ta uno cu lo bay den historia pa e tantisimo momento cu a purba impone cambionan riba e pueblo votador sin consulta.
Den un estado democratico e ta esencial pa cada voto di cada cuidadano cu derecho di voto wordo trata cu dignidad. E proceso electoral ta sagrado y cada voto ta conta y tin balor fundamental. Cada cuidadano tin e derecho pa mediante di su voto determina e rumbo di nos pais. Pa es motibo cada cuidadano tin derecho ariba un proceso husto, transparente y confiabel. Sin un proceso husto y confiabel e cuidadano lo sinti cu su boluntad no ta wordo expresa mediante di su voto, cual ta mina y destrui e confiansa den nos sistema democratico.
E institucion “Electorale Raad” tin pa percura cu cada voto wordo conta, e ta un principio fundamental di democracia. Nos ta anhela pa biba den un Pais unda e bos y boluntad di cada cuidadano tin balor. E ta un compromiso di nos tur pa percura pa democracia prevalece den nos sociedad.
Posibel iregularidad nan den nos sistema electoral ta crea desconfiansa den e proceso den su totalidad. Varios cuidadano a expresa nan desconfiansa pa cu e eleccion cu a caba di pasa. E obhecion nan di nos cuidadano no mester wordo tuma liviano. Den cuadro di transparencia, confiansa den e proceso electoral y integridad nacional mester elimina cualkier duda cu ta surgi den e proceso electoral. Nos cuadro legal articulo 84 “kiesverordening” ta brinda cada cuidadano cu tin derecho di voto e oportunidad pa entrega un peticion pa re-conta e voto nan di un of tur “stemdistrict”. Den “kiesverordening” tin mecanismo legal pa asina percura pa crea seguridad di e resultado, ma tambe crea trankilidad den nos comunidad cu cada voto a wordo conta hustamente.
Cualkier iregularidad cu ta sembra desconfiansa den e resultado electoral mester wordo elimina pa asina nos salvaguardia un proceso electoral cu cada cuidadano por confia y asina mantene un grado halto di democracia den nos Pais.
Awe mirando e circunstancia excepcional cu a surgi, e necesidad ta grandi pa elimina cualkier duda of desconfiansa cu a wordo sembra den e proceso electoral. Nos cuidadano nan a hasi un apelacion masal pa asina elimina cualkier duda cu a surgi mediante un re-conteo di e voto nan na un of tur ”stembureau”.
Diferente cuidadano preocupa como tambe partidonan politico a expresa cu nan a constata varios discrepancia relaciona cu e proceso electoral. Tin varios motibo hustificabel presenta cual lo por conduci na honra e peticion pa un re-conteo. E ta usual cu despues di un re-conteo e cantidad di voto pa partido politico por aumenta cu consequencia cu por tin un re-alocacion di asiento. Mirando e panaroma cu ta desaroyando eta sumamente importante pa crea transparencia relata na e discrepancia expresa pa nos cuidadano nan.
Den reino hulandes peticion pa reconteo no ta un fenomeno desconoci. Na aña 2016 hoofdstembureau di Sint-Maarten a dicidi for di propio iniciativa pa revisa tur e voto nan pa asina garantisa confiansa den e proceso electoral. E aña aki tambe na hermana Isla Curaçao tabata tin discrepancia relaciona cu e resultado di eleccion, aki tambe a honra e peticion haci di minoria y esnan cu no a logra asiento den e constelacion di e parlamento actual. E re-conteo aki a dura algun ora te na momento cu tur urna a ser controla den presencia di tur representante di partidonan politico y prensa, esaki ta loke a duna confiansa den e organo aki.
E discusion y consecuencia pa no re-conta e voto nan ta mas profundo cu nos ta realisa. E desicion awe a mina e confiansa den e sistema democratico di nos pais, cual ta un peliger pa cualkier estado di derecho democratico.
E proceso democratico mester ta optimal no solamente ora nos bai eherece nos derecho di voto, ma tambe na e momento cu cada voto di e cuidadano wordo trata cu balor y dignidad. Cada voto ta conta!
It’s not the voting that’s Democracy; It’s the counting
