Departamento di Impuesto ta anuncia cu na e momentonan aki tur contribuyente automobilista por cuminsa haci pago di impuesto di vehiculo di motor di aña 2022. Di e forma aki Departamento di Impuesto ta cumpli cu su promesa di permiti e contribuyentenan pa haci e pago mas trempan, dunando asina mas espacio financiero pa por cumpli. Manera ta conoci, e automobilista por scoge pa paga su impuesto di vehiculo di motor den un solo biaha of den mas biaha haciendo uzo di e servicio di pago parcial.
Servicio di pago parcial
Pa por facilita e contribuyentenan mas tanto posibel, Departamento di Impuesto ta brinda servicio di pago parcial, mescos cu durante e aña anterior. Cu e servicio aki e contribuyentenan por paga e impuesto di vehiculo di motor delanta y den pida pida. Na e momentonan aki e contribuyentenan tin 4 luna di tempo prome cu e fecha final di 31 di januari 2022 yega. Haciendo uzo di e servicio di pago parcial, e contribuyente por parti e peso financiero durante e lunanan venidero. Esaki ta beneficioso pa por ehempel e contribuyentenan cu ta den dificultad financiero of cu tin mas cu un auto. Pa e empresanan cu tin hopi auto, esaki ta un bon oportunidad tambe pa haci uzo di e servicio di pago parcial.
E condicionnan di servicio di pago parcial
E condicionnan pa e servicio di pago parcial ta lo siguiente:
∙ Ta paga e impuesto delanta, esta prome cu dia 31 di januari 2022.
∙ Ta haci e pago pa luna.
∙ Ta paga e suma minimo rekeri sea Afl. 50 of Afl. 200 (depende e categoria di plachi).
∙ No por paga menos cu Afl. 50 a menos cu e debe (restante) ta menos.
∙ Ta haci e ultimo pago no mas laat cu dia 31 di januari 2022.
E servicio di pago parcial ta valido unicamente pa pago di impuesto di vehiculo di motor.
Pago minimo ta depende e categoria di plachi
E pago minimo pa luna ta depende den cua categoria di plachi e vehiculo ta registra. Aki ta sigui un skema.
| Categoria di plachi | Suma minimo pa luna |
| A, V, MFA, MFV, TR, V, B (bus chikito) AG, BR, GAR | Afl. 50 |
| B (bus grandi), Plachi di nomber, DT, O, T | Afl. 200 |
Online Banking
Alabes Departamento di Impuesto ta recomenda su contribuyentenan pa paga via e sistema di Online Banking di Aruba Bank of Banco di Caribe, uzando e metodo di “Bill Payment”. Scoge e Biller: Account DIMP – Motorrijtuigbelasting.
Pa e pagonan online por wordo procesa debidamente, ta importante pa inclui e siguiente informacion: – Persoonsnummer na cual e vehiculo ta registra.
– E periodo di cuenta cu ta pagando (por ehempel: 2022).
– Number di auto.
Den e casonan aki lo tin cu jena: 12345678-2022-A92345
Pa esnan cu ta haci uzo di e servicio di pago parcial y ta haci pago via banco: por pidi e recibo online despues di completa tur e pagonan di e impuesto. Por pidi e recibo via www.impuesto.aw – Digitale formulieren y scoge ‘Kwitantie motorrijtuigbelasting aanvragen’.
Por acudi tambe na e oficina principal na Camacuri, e MFA-nan of edificio di Post Aruba na San Nicolas pa haci pago.
E fecha final ta 31 di januari 2022
Dia 31 di januari 2022 ta ultimo dia cu por paga e impuesto di e prome mita di aña 2022. Pa e vehiculonan cu ta cay den e categorianan MFA, MFV y Plachi di nomber, mester paga e impuesto di aña 2022 completo pa dia 31 di januari 2022.
Despues di 31 di januari 2022 no ta posibel mas pa paga e impuesto di e prome mita di aña 2022 den pida pida.
Plachinan di number 2022
Pa aña 2022 Departamento di Impuesto lo no otorga plachinan nobo. E contribuyentenan automobilista lo sigui uza e plachinan di number actual, esta esunnan cora cu blanco.
Cumpli na tempo
No ta necesario pa warda te ora e fecha final di 31 di januari 2022 ta cerca pa cumpli cu e pago di impuesto. Manera ta conoci, e contribuyente lo haya un boet di 50% pa incumplimento den caso cu no haci pago of haci e pago laat. Sea ta haci pago di impuesto den un solo biaha of den varios biaha, Departamento di Impuesto ta recomenda pa cumpli na tempo y evita asina gastonan innecesario.