Parlamentario A. Vallejo durante un conferencia di prensa a dedica atencion riba e un posibel fusion entre dr. Horacio Oduber Hospital y ImSan. Su ponencia tabata cla y raspa esta no por permiti un fusion entre e dos institutonan, pero mester explora un mihor cooperacion den beneficio di e patient. Esta bunita
palabranan y ken por ta contra tal declaracion? Ningun hende toch, pasobra e parlamentario parce di ta defende e interes general di e habitantenan di Aruba y en particular di San Nicolas toch? Mi persona tabata responsabel pa a laga construi ImSan cu e proposito pa dedica atencion primordialmente na PREVENCION y tratamento di e tantisimo complicacionan pa motibo di malesanan cardio-vascular a consequencia di sobrepeso. Historia a mustra cu capricho politico y interes partidista a evita pa e meta di ImSan haya continuacion durante e gobierno Eman 1 y 2. Parce cu e mesun capricho
politico y interes partidista/personal atrobe a lanta cabes, pero e biaha aki no di parti di e partido berde pero di e partido geel mes.
Parlamentario Arthur Vallejo por funciona como kaakchirurg na Aruba? E specialisacion ta exigi un estudio medico y di dentista pa despues por cuminsa cu e specialisacion, pues un estudio di por lo menos 15 pa 16 aña. Na di dos lugar e rekisito pa mantene e accreditacion ta exigi cu cada 5 aña mester cumpli
cu 16 ora pa siman di ta ehecuta e función. Tambe cu mester tin 200 ora di recapasitacion pa medio di conferencianan internacional. Ta obvio cu Vallejo na Aruba en todo caso no a cumpli cu e exigencianan menciona despues di a termina su specialisacion di kaakchirurg na 2011. Ta hopi peculiar cu e director
medico di ImSan cu a specialisa na Hulanda a permiti pa e operacion a tuma lugar na ImSan apesar cu Vallejo no ta cumpli cu e accreditacion hulandes y pio ainda sin un back-up si encaso un complicacion lo a rekeri un tratamento na Hospital. Lo ta bon pa puntra e director di Imsan cu ken su interes e ta cumpli
enbes di punta dede riba e director di Hospital. Of tin otro interesnan cu no ta esun di e pueblo. E caso di Vallejo ta otro prueba cu interes personal parce di ta e mayor motibo pa drenta politica y cu conflicto di interes no ta conta pa e parlamentarionan di gobierno, pasobra den parlamento Vallejo a logra di consolida su esfuerso pa bypass AZV y Hospital y logra traha como kaakchirurg. Otro aspecto cu e caso Vallejo mester atencion ta e decadencia di e ideologia social-democrata cu su mesun partido ta profesa. E ideologia social-democrata ta rekeri un cuido medico accesibel y di calidad pa TUR hende. Esey tabata e motibo pa e introduci AZV. Un ideal di e fundador di MEP, sr. Betico Croes (dfm). Vallejo awor ta cuestiona e pensamento noble aki y ta implica cu e cuido medico actual ta demasiado centralisa y ta mina y kibra e libertad y capacidad di autodeterminacion di e hende, patient y pueblo. Vallejo parce a perde e nocion di e realidad financiero na Aruba y kende ta na mando oficialmente. No ta su gobierno a ignora nos autodeterminacion cu entrega di nos autonomia y mester cumpli cu e exigencianan hulandes pa entre otro reduci e gasto di cuido medico cu 60 miyon florin? Vallejo tambe ta mustra di no sa mucho di e retonan di economianan chikito manera di Aruba ora e ta elabora riba negoshinan chikito. Aki Vallejo parce di kier habri caminda pa clinicanan priva haya permiso pa bin traha aki. Kico esaki nifica pa e gasto medico cu ya caba ta den cora? Pero ta obvio cu di e foma aki lo kier cumpli cu cierto amigonan cu kier drenta cueste lo que cueste den nos cuido medico sin cu ta cumpli cu tur rekisito
Nos a adverti pa no permiti politica partidista mete den cuido medico. Cuido medico mester keda accesibel pa TUR hende, pero cuido medico di calidad ta caro y p’esey mester hasi tur esfuerso pa laga e cuido keda pagabel. Pa cumpli cu e meta aki mester evita tur tipo di interes partidista/personal den e maneho di cuido medico y di nobo fortalece e pensamento real social-democrata esta cu e cuido mester ta accesibel pa TUR hende.
