Partido MEP den un declaracion publico a reacciona mesora riba declaracion di un funcionario policial cu a ataca nan candidato Rocco Tjon. MEP ta condena e declaracion di e funcionario aki, pasobra ta cosnan cu no ta cuadra cu berdad.
Na diferente ocasion lider di MEP a bisa cu na momento cu no tin argumento valido mas, contrincantenan ta cuminsa ataca e politiconan di MEP personalmente. Y esey ta loke nan ta bisa cu a sosode den e caso di e funcionario policial Paola Goede, kende ta casa cu un persona liga na e partido berde.
E Arubiano a combersa cu diferente politico di e partido, kendenan ta lamenta e insinuacionnan baho aki y sushi cu a bini dilanti den e declaracion. Hopi a cuestiona di con e señora no a papia anteriormente riba e caso aki pero a warda awor cu falta algun dia pa eleccion pa trece e cosnan aki dilanti. Si di berdad e ta preocupa pa husticia, e mester a actua di hopi aña pasa y no awo na bispo di eleccion.
E coleganan di partido di Rocco Tjon a bisa tambe cu ningun caminda a wordo declara preto riba blanco cu Tjon a haci su culpabel na un delito di inmoralidad. Hamas e lo por a bira director di KIA si tabatin algo riba su nomber. Ademas, nunca e mester a bay dilanti mesa berde pa un caso asina. Inclusive, e tin un carta di Ministerio Publico unda ta bisa cu a seponeer e caso aki contra dje.
Ademas, si wak e carta den cual Ministerio Publico ta inform’e di a seponeer e carta, esaki ta data di juli, 2010. E tempo ey MEP no tabata den Gobierno sino AVP. Niun momento por bisa cu MEP a uza su influencia pa seponeer e caso. E politico ta lamenta declaracion relaciona cu un problema personal cu su persona a haya su mes aden despues cu a dicidi di haci su bida cu un persona cu no ta mama di su prome yiu.
Otro analistanan consulta a papia cu esaki ta tipo di tacticanan di antaño pa uza den politica, tempo di cauchi baula pero cu no ta pertenece den e era moderno aki, unda contrincantenan meter enfrenta otro cu informacion veraz. Mester trata di convence pueblo cu argumentonan sano di loke ta beneficia e pueblo y no cay den atakenan baho cu no ta beneficia ningun hende. Pio pasobra ta uza den esaki un menor di edad.
Politico- y simpatizantenan di MEP ta bisa di no por conclui otro cu nan contrincantenan ta sinti nan mes desespera pa e eleccion di diabierna awo y no ta mira otro forma cu kibra e partido geel sino bay den atakenan baho manera esun contra Rocco Tjon, kende ta profilerando su mes como e persona ideal pa ocupa e puesto di Minister di Husticia.