Na Mariniers Kazerne Savaneta a tuma lugar ceremonia oficial den presencia di Minister di Husticia y Asuntonan Social Sr. Rocco Tjon, Sr. Silvio de Mey Hoofdinspecteur di Cuerpo Policial Aruba, personal di Arumil y algun invitado mas pa celebra e trayectoria largo y bunita di Arumil cu a celebra 40 aniversario.
Sigur por mira bek Semper un bon colaboracion entre Polis y Arumil. Pa hopi tempo Polis y Arumil ta traha hunto den diferente tereno pero tambe sa haci ehercisio hunto. Dos diferente petchi pero pa un causa dor di mantene e seguridad Nacional di Pais Aruba.
Sr. Silvio de Mey – Hoofdinspecteur di Polis ta manda un palabra di pabien na cada personal cu a y ta forma parti di Arumil y cu a hiba Arumil na su 40 aniversario. Cu hopi determinacion y disciplina por mira e frutonan cu Arumil awor ta cosechando.
Na final di dia diferente departamentonan Hudicial pero tambe Seguridad a bini hunto pa asina participa den un asina yama “Funstacle”, ariba tereno di Marinies Kazerne mes pa asina termina e dia di celebracion aki.
A prepara un bon scenario den otro pa asina e departamentonan cu a partica manera CEA, AAA, KMAR, MSK, Kustwacht, Formacional Social, ex Arumil, 32ste, Curmil, Arumil y KPA bataya contra otro den higra di solo. Sigur un tremendo actividad na unda cu a sostene otro pa asina por a yega t’e final. Polis y Arumil tambe a bataya duro contra otro pero na final di dia Arumil ta dal un paso dilanti y ta gana Polis den e actividad amistoso aki.
For di e 20 teamnan cu forma y participa solamente tin un ganador. Na prome y di dos lugar a bay pa Arumil, di tres lugar Curmil, di cuater Lugar MSK y di cinco lugar KPA. Cada un team tabata algun seconde leu di otro pa por a yega final den un tremendo esfiuerso.
Masha pabien Arumil cu boso 40 aniversario, sigur nos di Cuerpo Policial Aruba ta gradici boso dedicacion, esfuerso y disciplina cu ta forma parti di e cadena Hudicial.
