Willemstad- Den kuadro dje polémikanan rondó di e asina yama Lei di “Screening”, Parlamentario Calmes a manda un karta pa Minister Presidente (MinPres) puntrando kuantu dje eks ministernan a kumpli ku Artíkulo 17 di e Lei. “E kontesta p’ami ta prueba ke lei aki tin otro eror òf un buraku”; sigun Calmes.
Artíkulo 17 di e Lei di “Screening” ta enserá ku kada Minister despues di bandoná e funshon di Minister mester raportá na MinPres e.o. si su pertinensianan a oumento durante e periodo di nan gobernashon. E akshon aki mester tuma lugá den 30 dia despues di retiro komo Minister. Pa por kontrolá efektividat dje Lei i partikularmente e artíkulo 17 aki Calmes a dirigí un karta na MinPres puntrando kuantu eks Minister a kumpli ku Artíkulo 17 for di 2012 ora e Lei di Screening a drenta na vigor. Desafortunadamente MinPres a kontesta Calmes bisando ku e no por divulgá niun informashon .
Calmes ta di opinion ku e no a puntra nòmber di niun eks minister, pasombra esaki ta kai bou dje asina yama “geheimshoudingsplicht”. Artíkulo 17 ta manera un “check” pa kualke mandatario no enrikesé su mes di un forma òf otro durante su gobernashon. Pa Calmes menshonándo e kantidat ku a kumpli ku Artíkulo 17 lo a mustra e efektividat dje Lei aki. Aworaki esaki ta krea mas duda den e lei aki. E hecho ku no ta menshoná ni e kantidat di mandatarionan ku a kumpli Calmes ta kalifiká komo un buraku den e Lei ku Parlamento a aprobá na 2012 pero awor no por wòrdu kontrolá.
