Autor Poeta Ruthy C. Vrieswijk-Bergen
NOS CULTURA CU SU DOLOR
Ach, ach, ach, mi no kier ta den un beis negativo
Pero ya mi a expresa tur cos bunita, dushi y positivo
Den mi poemanan anterior den e competencianan aki
E otro participantenan ya no tin nada nobo di bisami
Cu mi no sa caba di mi dushi y bunita isla bendiciona : Aruba !
Pesey, awe, Lady Ruth, ta focus riba “sintimento”
No riba show di bistimento of fingi cu tur famia tin alimento
Pero kiko ta come, bebe y biba den nos humilde comunidad
Oh, ki tristo cu tin falta di mas union, respet y honestidad
Tin cu ta ignora e ganjamento, hortamento , violacion of un atraco
Y nos autoridadnan ya no tin bista pa por controla tur cos mas
Demasiado hotel, demasiado auto, e situacion di Bubali Plas
Pero, aparentemente, tin esnan na top, cu kier sigui den nan fantasia
Tur cos ta drai rond di e asina yama super economia
Prijsnan aumentando, causando pobreza den un of mas famia
Ku ki curason, ku ki sintimento nos por sigui celebra cu alegria
Nos dia Nacional, si pa tur den pueblo no ta tur cos ta igual ?
Ya Lady Ruth a yega di expresa su preocupacion encuanto digitalisacion
Tur cos via computer, tur cos on line, pagamento cu e carchi di swipe
Ay, ta cuanto mas nos pueblo tin cu soporta na nan mente y curason
Mi por sigui papia di cosnan mahos, doloroso, tristo y negativo
Pero, te aki, mi poema di sintimento den algun situacion explosivo
Hopi ta soporta y tolera mientras hopi no kier mira ni tende
Nos ta keda ta e Poeta Local cu sintimento y na prome lugar hende
Ruthy “Lady Ruth” Vrieswijk-Bergen