Edison Ellis i Din Domacasse di partido MPB ta hopi preokupá ku
loke ta pasando ku Plantashi Fòntein òf mihó bisa ku loke NO ta pasando ku Plantashi
Fòntein. ‘Riba medionan sosial nos por a mira e notisia ku Plantashi Fòntein ta será na kandal
sin ningun moveshon. Vários potrèt i video ta mustra nos kon e bunita sitio akí ta
deteriorando. Tur hende sa ku aña pasá e gobiernu anterior a kumpra Plantashi Fòntein for di
un doño privá, ku e meta pa e bin bèk den man di gobiernu di Boneiru i bira un parke públiko
kaminda pueblo por disfrutá di dje. Fòntein ta un sitio úniko na Boneiru ku hopi mata grandi
ku ta duna hopi sombra i kaminda awa dushi ta kore den forma natural for di den kueba bin
pafó. Nos sa ku e gobièrnu anterior a disidí pa instalá un komishon di eksperto di agrikultura,
naturalesa, kultura i turismo pa huntu sigui desaroyá e plantashi den e vishon ku e gobièrnu
anterior a laga atras pa hasié un parke públiko ku tantu nos pueblo komo nos bishitantenan
por bishitá diariamente. Nos no por kere ku despues di 8 luna ainda nada no a sosodé ku e
parke aki,’ segun Ellis i Domacasse.
‘Ta lamentabel pa skucha sra. Coffie huntu ku sr. Abraham bisa den pueblo ku kompra di
Plantashi Fòntein no a tuma lugá, poniendo ku un periodista mester a sali kita tur duda pa
medio di saka e akta di notario ku ta komprobá e kompra akí. Esaki sin ningun duda ta mustra
ku e plantashi ta bèk den man di gobièrnu di Boneiru. Komo èks miembronan di Konseho
Insular ku e tempu ei a aprobá e proyekto i a pone sèn disponibel pa kumpra Plantashi Fòntein
bèk nos ta bastante preokupá. Ta parse manera e gobièrnu aki no tin kurason pa nos pueblo!’
Segun Din Domacasse i Edison Ellis tur esaki tabata motibu pa via frakshon di MPB den Konseho
Insular hasi e siguiente preguntanan na Kolegio Ehekutivo. Kon ta pará ku e proyekto di
Plantashi Fòntein? Dikon gobièrnu no a hasi nada mas ku Plantashi Fòntein? Kiko ta gobièrnu su
intenshon ku e plantashi akí? Gobièrnu ta bai sigui ku e ekspertonan di entre otro agrikultura,
kultura i naturalesa pa ehekutá e proyekto di un parke públiko pa nos pueblo?
Finalisando Ellis i Domacasse ta bisa ku nan ta spera ku pronto ta bin klaridat tokante kiko ta bai
pasa ku Plantashi Fòntein. ‘Nos hendenan mester sa ki dia nan por drenta den e parke i disfrutá
di un piknik ameno òf pa landa den e bakinan di awa manera antes.’
