ORANJESTAD,Aruba
Gobierno oficialmente a kibra contract cu e compania CITGO y definitivamente e plan di reapertura di e refineria pa San Nicolas, a yega su fin y miembro di partido AVP, Melvin Tromp ta mustra cu nada a cambia cu vision di partido MEP.
Segun sr Tromp den pasado caba gobiernonan di MEP a percura pa cera e refineria, a percura pa core cu compania Mericano cu tabata manehando e refineria y awor despues di a haci tanto fanfario cu ora zero, ata un biaha mas Prome Minister y lider di MEP, ta firma e final di e plan di reapertura.
“Aruba conoce bon bon cu gobiernonan di MEP nunca a haci algo pa pueblo di San Nicolas y awor e situacion no ta otro caminda Prome Minister Evelyn Wever Croes ta papia di plannan grandi pero en realidad ta trata aki di plan pa famia-, amigo- y sponsornan.
Tur cos cu pueblo a ripara te na e momentonan aki den henter e asunto di refineria ta e hecho cu a termina e contrat cu CITGO y cu lo tin interes pa huur e tankinan pa almacena petroleo.
Sinembargo den tur loke Minister Presidente a mustra te cu awor, ta algun compania fantasma, un miedo pa bisa di kende e companianan aki ta, di unda nan ta bin of kico realmente nan kier saca for di e tankinan di e refineria.
Evelyn Wever Croes a papia cu den un pa dos luna di tempo lo controla y prepara e tankinan aki pa nan wordo gehuur pero no ta menciona ta kende e companianan ta y mientras cu e ta papia cu henter e proceso aki lo bay den un forma transparente, te ainda ningun hende sa ta di cual compania e ta papiando.
Mientras tanto tin desaroyonan si tumando luga den e refineria, caminda tin indicacion cu e compania operado nobo di e tankinan aki, ya ta conoci y cu ya lo a yega na un areglo caba cu gobierno.
No tin transparencia manera Prome Minister a priminti ya cu tur cos ta regla caba manera e desaroyonan ta mustrando y un biaha mas pueblo ta wordo engaña pa un lider politico cu ya caba a gaña henter un pueblo cu e lo goberna sin medida pero a goberna pa casi tres aña caba, solamente a base di medida.
Prome Minister tambe a papia di negociacionnan pa reapertura di e refineria pero un biaha mas e no ta menciona nomber riba cual e companianan aki ta y ta kende nan ta.
Ta mesun Evelyn Wever Croes aki den un reunion di Parlamento den pasado a bisa na bos grandi den Parlamento, cu porta di companian cu ta habri pa Evelyn Wever Croes, no ta habri pa Mike Eman pero nunca, jamas el a menciona nomber di un companianan aki.
Pueblo a spera cu awor cu CITGO a bay cu su persona por fin lo a bin cu un di e gruponan aki cu tin porta habri pa su persona, pa sigura henter pueblo cu e refineria lo bay habri sigur y cu hopi hende lo haya trabou.
Sinembargo pa di tantisimo bes pueblo por mira atrobe cu Evelyn Wever Croes nunca ta papia berdad, nunca ta di confia ya cu e hende nunca ta central den maneho di su gobierno pero solamente friends and family y amigo cu sponsornan,” Melvin Tromp a declara.
