A drenta notifikashon di parti di e Pòst Sentral di Polis na Boneiru, pa e Sentro di Reskate
i Kordinashon di Wardakosta di Karibe Hulandes. Miembronan di famia di dos piskadó a tuma
kontakto ku Polis, pa motibu ku nan dos no a bolbe bèk di laman. E dos hòmbernan a sali di
Boneiru djadumingu último pa bai piska i lo a bolbe kas bek djaluna atardi.
Wardakosta despues di e notifikashon di parti di Polis, mes ora a manda e helikòpter di
Wardakosta Boneiru pa ehersé un búskeda. E tripulashon di e helikòpter durante nan búskeda
no a opservá e boto ku e hòmbernan na bordo riba laman. E avion patruyero di Wardakosta den
oranan di mainta a tuma e akshon di búskeda over di e helikòpter, i a buska rigorosamente den
henter e área. Durante oranan di mèrdia e tripulashon di e Dash por fin a mira e boto den
serkania di e parti Nortost di Boneiru. E Sentro di Reskate i Kordinashon di Wardakosta
despues di a enkontrá e boto ku e piskadónan, mes ora a dirigí tantu e helikòpter komo un boto
patruyero Metal Shark na e lokalidat pa wak kon e situashon ta. Na yegada a resultá ku e
piskadónan tabatin problema ku motor i tabata drif riba laman. Ámbos hòmber tabata den bon
kondishon di salú i no tabata falta nada. E tripulashon di e helikòpter a suministrá awa na e
hòmbernan pa bebe i a keda den serkania di e boto te na momentu ku e boto patruyero di
Wardakosta a yega. Na yegada di e Metal Shark nan a tou e boto i a sleep esaki i tres’é sano i
salvo bèk Boneiru
