Pronto Aruba ta bay cera conoci cu un proyecto piloto di un fundacion cu no solamente ta crea un experiencia nobo pero tin como meta principal conscientisa nos hendenan riba proteccion di nos medio ambiente / bida marino.
E figura importante den e proyecto aki ta e pintora Marion Gerard, di Canada.
Marion H. Gerard ta un di e 5 Sub-Aquatic Painters cu tin na mundo. Un genero y disciplina crea pa André Laban na aña 1968, un ingeniero conoci pa su colaboracion cu e famoso personalidad Jacques Cousteau .
E acto aki ta un proceso cauteloso y responsabel pasobra ta pinta e cuadranan bou di awa, na diferente profundidad y temperatura, pero tambe e diferente tipo di colornan cu tin na cada profundidad (mas hundo bo bay, mas e colornan ta cambia bou awa, door di refleho y falta di luz). Sin conta cu tin dia lama ta keto y tin dia troebel. Di e proyecto aki lo tin mas informacion den futuro.
E artista Marion tin e record di e pintura realisa na e punto mas profundo posibel, cu a haya reconocimento di Guiness World Book of Records ( # 15091722461tdup) na aña 2016 na un profundidad di 106ft (32.4 meter) y e temperatura eybou tabata 3 grado celcius. Tur esaki el a haci cu e meta di educa y trece mas conscientisacion riba naturalesa, cuido di nos medio-ambiente y aprecio pa tur loke nos bida marino tin di ofrece.
Durante e pandemia e pintora Frances-Canades a sufri un accident cu a lag’e 2 aña na cama y desde december ultimo a cuminsa cana bek despues di a wordo declara invalido pa su dokternan. Durante su vakantie na Aruba e rehabilitacion a cuminsa y no a solamente el a cuminsa bucea bek, cu acompañamento di e profesionalnan di Pure Diving Aruba, y tabata aki cu el a cuminsa pinta atrobe despues di su accidente. Esaki tabata e inicio di un era nobo, cu meta- y recordnan nobo.
Su mision di bida cu a cuminsa 9 aña pasa a haya bida atrobe. Pero tur persona interesa por cera conoci cu Marion, combersa, dialoga, intercambia idea y experiencianan encuanto e posibilidadnan pa un miho futuro pa nos muchanan.
Marion lo tin su prome 3 obranan pinta na Aruba exponiendo na Aruba Art Fair cu tuma luga e weekend binidero. Manera cu esey caba, diamars en adelante lo cuminsa cu e prome di 6 sesion di buceo/dive pa e luna di november. Tur esaki en conexion cu lansamento di Red Cactus Foundation Aruba (i.o.v). Esaki lo culmina cu un exposicion di tur e obranan, nan storia, meta y ademas colaboracion cu pilarnan di cuido di nos dushi isla. Ban hunto haci e diferencia y cuido cu nos pida baranca merece.
Pa detayes encuanto fecha y bookings di e charternan (entre 8 te cu 24 di november) por contacta Pure Diving libremente na: (+297) 5611607 , (+297) 5689678 of e-mail: dive@puredivingaruba.com
