E penetrashon di COVID-19 den nos komunidat ta preokupante, pues ta imperativo pa mantené e reglanan di higiëna i distansia na skol; optimalisá e rekursonan digital na tur nivel di enseñasa; i
duna sosten i infomashon na direktivanan di skol, maestro, mayor i alumno. PIN ta konsiderá esaki e prioridat number unu pa enseñansa por tuma lugá den trankilidat. E ta bai dilanti di e prioridatnan poné pa minister Croes, esta “nulmeting” den enseñansa, renobashon di edifisionan di skol i e konsepto di “teach them young” pa siña mucha norma, balor i disisplina. Mester atendé promé ku Covid-19 den skolnan pa krea trankilidat den enseñansa serka studiante, mayor i maestro!
Ounke ekspertonan a bisa ku mucha no ta ser infektá lihé ku e viro di COVID i ku nan no ta pega un otro fásil, mas i mas skol ta severamente afektá pa Covid. Kanando na diferente skol i kombersando ku maestronan, bo ta haña sá ku COVID a penetrá bastante fuerte den skol. Mayoria skol a haña nan ku e situashon ku sea tim di maneho kompleto ta òf tabata na kas, dos òf mas klas kompletu será, òf henter e skol será pa dos siman pa motibu di COVID. Na yüni/yüli di e aña aki, ministerio di Enseñansa, Siensia, Kultura i Deporte (ESKD) huntu ku direktivanan di skol a organisá e sistema di skol di tal forma ku e maestro tabata traha den grupo chikí di máksimo 15 alumno. Na skolnan sekundario a hasi esei prinsipalmente dor di parti e klasnan na dos i alterná un siman di lès digital k’un siman di lès den klas. E forma aki ta hasi e situashon hopi mas seif pa tantu e alumno komo e maestro i nan famianan. PIN ta kere ku e alternativa aki ta e mihó sistema pa krea distansia den klas. Ademas, k’un grupo chikí di alumno e maestro ta sinti su mes sigur i por hasi mas.
For di e kombersashonnan ku maestronan ta resaltá ku Gobièrnu mester duna klaridat úrgente riba e sigiente puntonan:
- Dikón ta mantené klas ku grupo grandi, ku e riesgo ku muchanan ku ta karga e viro ta pega nan maestro o hiba esaki kas pa nan famia.
- Si mayoria skol lo terminá e aña eskolar alkansando e terminonan final manera debe ser.
- Minister-presidente a deklará ora a firma e akuerdo polítko COHO ku Hulanda a pone un fondo disponibel pa atendé mesora ku enseñansa, e interogatorio ta. kuantu fondo tin pa mitigá e efektonan di COVID riba enseñansa.
- Den ki grado ta logra mantené higiëna na e diferente skolnan di fundeshi i sekundario.
PIN ta úrgi minister di enseñansa pa revisá e maneho pa laga skol mantené grupo grandi di alumno den klas i pa klarifiká e puntonan deskribí.
PIN dotá ku amor pa enseñansa!