E pik di kontagio ku e variante ómikròn ta bai bira muchu mas ku e kantidat mas haltu di kontagio ku e variante alfa (variante britániko) na mart 2021. E departamentu di Salubridat Públiko ta yega na e konklushon akí a base di sifranan di kontagio den e promé siman di yanüari 2022. Djamars 4 di yanüari 2022 tabatin 133 kontagio nobo, aña pasá e pik mas haltu tabata 24 di mart, e tempu ei tabatin 73 kontagio nobo. Na mart aña pasá e kantidat mas haltu di kontagio tabata 308 pa siman. Di djaluna 3 di yanüari 2022 te ku djárason 5 di yanüari 2022 tin kaba 305 kaso di kontagio nobo na Boneiru.
Salubridat Públiko ta sali for di e punto di bista ku e variante ómikròn di e vírùs di corona ta bai dominá e variante dèlta hopi rápido. Esaki ta bini pasobra hende ta kontagiá rápidamente i fásilmente ku e variante ómikròn. E promé investigashonnan ta mustra ku hendenan ku kontagiá ku e variante ómikròn, generalmente tin ménos keho severo. Tòg por sobrekargá kuido ku kontagio ku e variante akí. Esaki ta bini komo ku hopi hende ta kontagiá ku esaki rápidamente, ku ta pone ku den tempu kòrtiku ta surgi un preshon muchu grandi riba kuido.
Investigashon a mustra ku hendenan ku ta kompletamente bakuná òf a haña corona, no ta bon protehá kontra kontagio ku e variante ómikròn i kontra hospitalisashon. E angua di buster por ofresé e hendenan akí un protekshon èkstra. Un persona ku a pasa e angua di buster, ta protehá pa 65-75% kontra kontagio i pa 80-90% kontra hospitalisashon. Siudadanonan ku no a pasa e angua di buster ainda, por yama e number grátis 0800 0900 pa traha un sita pa pasa angua.
Investigashon di e departamento di Salubridat Públiko ta mustra ku durante fakansi di Pasku hopi ménos hende tabata dispuesto pa hasi tèst. E departamento ta preokupá ku esaki. Ta asina ku tin muchu mas kontagio di corona na Boneiru ku e kantidatnan ku e departamentu ta registrá. Di e hendenan ku sí a tèst, 30% tabatin un resultado positivo di un tèst propio. Esaki ta nifiká ku mas i mas hende ta hasi uso di un tèst propio.
E departamento ta hasi un yamada na siudadanonan ku keho, hendenan ku tabatin kontakto estrecho ku un persona ku tabata kontagiá, i hendenan ku resultado positivo di un tèst propio, pa tèst na e kaya di tèst. Asina e departamento di Salubridat Públiko ta keda ku un bon bista di e kantidat di kontagio na Boneiru. Bo tin keho? Yama e ora ei e number grátis 0800 0800 pa traha un sita pa tèst. Bo no a pasa e promé òf di dos angua òf e angua di buster ainda? Yama e number grátis 0800 0900 pa un sita pa pasa angua.
