ORANJESTAD,Aruba
Tienda di Ley a pone enfasis den e prome dos articulonan cu a wordo publica con ta obtene e nacionalidad Hulandes ‘van rechtswege’ esta segun ley. Nos a elabora riba e articulonan 3 te cu articulo 5 di e Rijkswet Nederlanderschap. A raiz di esaki a haya varios pregunta cual nos di Tienda di ley lo kier elabora riba e preguntanan. Pa haci esaki mas duidelijk cu ta posibel nos a selecta dos scenario specifico. Basa riba esaki nos lo splica y duna un contesta kiko ta posibilidad di e mucha pa e haya su nacionalidad Hulandes.
Scenario 1: Mama y tata ta den posicion di un nacionalidad stranhero bibando mas cu 20 anja na Aruba cu firma liber y un yiu ta nace na Aruba durante cu ambos mayor ta den posicion di un firma liber. Ki posibilidad tini pa e mucha haya nacionalidad Hulandes?
Scenario 2: Un homber cu nacionalidad Hulandes ta reconoce yiu di su pareha cu tin un nacionalidad stranhero. Ki posibilidad tini pa e mucha haya nacionalidad Hulandes?
Contesta scenario 1
Na promer lugar mester enfatisa riba e hecho di tin un estadia legal conforme ley di Aruba no ta un base pa haya nacionalidad Hulandes. Si un mucha a nace na Aruba pero su mayornan tin nacionalidad stranhero e no por haya e nacionalidad Hulandes. Kiko ta e posibilidadnan? Mirando e hecho cu ambos mayor tin mas cu 20 aña na Aruba y ta den posicion di firma liber por mira riba e posibilidad pa e mayornan haya nan nacionalidad Hulandes prome. E mayornan den e caso aki mester inicia e procedura pa asina pa medio di naturalisacion (art. 7 RWN) logra haya e nacionalidad Hulandes. Basa riba art. 11 inciso 1 RWN un mucha menor di edad cual su mayor haya e nacionalidad Hulandes door di naturalisa automaticamente tambe lo comparti e nacionalidad Hulandes door di su mayor. Mester tene cuenta si cu e mayor mester menciona explicitamente pa e mucha forma parti di e naturalisacion di un di e mayornan. Den un otro relato pa prensa lo nos ta elaborando riba e tema di naturalisacion y e procedura concerni.
Contesta scenario 2
Na momento cu un homber di nacionalidad Hulandes reconoce e yiu di su pareha prome cu e yiu cumpli e edad di shete aña, e yiu lo adkeri e nacionalidad Hulandes. Esaki ta stipula den articulo 4 inciso 2 RWN. E yiu lo haya e nacionalidad Hulandes desde e momento cu el a wordo reconoci. Den caso cu e homber di nacionalidad Hulandes reconoce e yiu di su pareha prome cu e yiu nace, e yiu lo tin e nacionalidad Hulandes desde su fecha di nacimento.1
1 https://www.amsterdam.nl/veelgevraagd/?productid=%7B25BE82E9-1187-47B9-B52F-05E8EDE56980%7D#case_%7BBF6BD866-CAB1-458C-A20B-C40ECAFE8BAD%7D
Material genetico
Si acaso e yiu tin por lo menos shete aña y ta mas jong cu diesocho aña, e tata lo tin cu demostra cu e ta
e tata biologico di e yiu door di haci un DNA test. E test aki mester wordo duna dentro di e periodo di un
aña despues di a reconoce e mucha.2
Bo no ta e tata biologico?
Si abo como reconocedor di e yiu, no ta e tata biologico, toch e yiu por haya e nacionalidad Hulandes a
traves di opcion (optie). Esaki ta stipula den articulo 6 inciso 1C RWN. Naturalmente esaki ta mara na
cierto criterianan. Prome criteria ta cu e mucha tin por lo menos shete aña y ta mas jong cu diesocho
aña. E di dos criteria ta cu e homber a reconoce e mucha. E di tres criteria ta cu e homber mes tin e
nacionalidad Hulandes y por ultimo cu e homber a cuida y cria e yiu por lo menos pa un periodo di tres
aña antes di a haci e peticion di opcion (optie) pa e yiu di su pareha.
Den un otro edicion lo elabora riba e alternativanan di optie y naturalisacion pa haya nacionalidad
Hulandes. Tienda di Ley kier enfatisa cu a trata mas tanto posibel na splica e articulonan aki den
Papiamento pero no tur biaha tin palabranan huridico exacto cu por wordo usa. Ta spera cu por
a informa e lector un poco tocante dos scenario specifico cu nos a presenta.
2 https://ind.nl/Nederlanderschap/Paginas/Nederlander-door-geboorte-of-erkenning.aspx
