ORANJESTAD, Aruba
Den e articulo anterior nos a pone enfasis con un tata lo por haya e autoridad paternal (ouderlijk gezag) di su yiu. E articulo aki lo por wordo considera un continuacion di e tema anterior pero poniendo mas atencion riba e aspecto di derecho y obligacionnan di un mayor ora e tin autoridad paternal.
E autoridad paternal no ta trece solamente derechonan cune, sino tambe cierto obligacionnan cu e mayor tin cu cumpli cune. E mayor cu tin e autoridad paternal di e yiu tin e deber (pero tambe derecho) di cuida y educa su yiu, esaki ta regla den art. 1:247 inciso 1 BWA. Ademas di esaki, e mayor tin cu realisa actonan oficial (officiële handelingen) pa e mucha, como por ehempel firma na momento di haci un peticion di paspoort. Siguientemente nos lo menciona algun derecho y deber cu un mayor cu autoridad paternal tin:
Deber/derecho di cuida y educa bo yiu
Como mayor abo ta dicidi con bo ta cria bo yiu. Ley ta establece den art. 1:247 inciso 2 BWA cu como mayor bo mester cuida e bienestar fisico y mental di bo yiu, pero tambe bo tin e deber di yud’e desaroya su personalidad. Ta mas cu claro cu bo no por abusa di bo yiu.
Deber di paga educacion y cuidado di bo yiu
Mayornan cu tin e autoridad paternal tin cu paga e educacion y cuidado di e yiu. E obligacion di mantencion aki ta termina na momento cu e yiu alcansa e edad di 21 aña, art. 1:395a BWA. Den e version nobo di nos Codigo Civil lo aumenta e edad te 25 aña. Hasta si e mayornan divorcia, ambos ta keda responsabel pa continuamente cumpli cu e deber aki.
Actonan oficial (officiële handelingen) den nomber di bo yiu
Personanan menor di edad mayoria biaha no por realisa actonan oficial di forma independiente. Por ehempel nan no por firma of conduci un demanda na corte. Si abo como mayor tin autoridad paternal di bo yiu, bo por realisa e tipo di actonan oficial aki den nomber di bo yiu. Otro ehempelnan lo ta inscribi bo yiu na un scol of duna permiso pa un tratamento medico pa bo yiu. Pa ley bo ta e representante legal dibo yiu.
Responsabilidad pa dañonan causa door di bo yiu
Bo yiu ta menor cu 14 aña? Si bo yiu comete un acto ilicito (onrechtmatige daad) y door di su actonan e a causa daño na otronan, abo como mayor ta keda responsabel pa e daño haci, art. 6:169 inciso 1 BWA. Por ehempel bo lo tin cu paga e gastonan mara na e daño cu bo yiu a causa. Bo yiu tin entre 14 y 16 aña? Den e caso aki ta depende di e situacion si abo como mayor ta responsabel. Un mucha desde 16 aña di edad ta responsabel pa su mesun accionnan den caso cu e comete un acto ilicito y a causa daño na otronan door di su actonan.
Deber/derecho di maneha e parti financiero di bo yiu
Si bo tin e autoridad paternal, bo tin e deber di administra e bienes di bo yiu, art. 1:245 inciso 4 jo. art. 1:253i BWA. Si bo no haci esaki corectamente, abo como mayor lo ta responsabel pa cu e dañonan cu resulta di e mal maneho. Por ehempel, si e mucha a hereda placa y un mayor uza e placa aki pa su mes.
Tienda di Ley kier enfatisa cu a trata mas tanto posibel na splica e terminologianan aki den Papiamento pero no tur biaha tin palabranan huridico exacto cu por wordo uza. Ta spera cu por a informa e lector un poco tocante e topico aki. Si bo persona tin pregunta of ta desea asistencia huridico por tuma contacto cu nos via nos facebook page of nos e-mail: plataformahobennanprofesional@gmail.com.
Scirbi pa studiantenan di ley:
Gerick Croes LL.B. , BEc
Minorca Martis LL.B.
