Awe nos mester tuma despedida di Philo, cu pena na nos curason.
Un amiga stima, un gran persona, amabel, humoristico y balente cu no tabata acepta inhusticia. Cu su bos y pen skerpi e tabata expresa esey. Ken no ta corda e poema “Placa, placa, placa” cu a capta masha atencion y a causa hopi emocion den pueblo un 20 aña pasa?
Philo tabata masha productivo como poeta: el a publica den e revista “Watapana” y den e antologianan Di Nos (1971) y Cosecha Arubiano (1983). El a publica na aña 1984 e coleccion di poesia ’Mi’ ta biba den mi pensamento, na aña 1986 Na caminda pa independencia y na 1992 Di ta … pa tabata.
Den su poemanan Philomena ta toca diferente tema importante di bida. Philo tabata militante, e no por a soporta inhusticia y den su poemanan e ta ataca esaki fuertemente: inhusticia contra e mucha (‘Maltrato’), contra e hende muhe (‘Tin orguyo’), contra nos grandinan(‘Anciano’). Philo mes a experencia esaki personalmente durante e ultimo añanan y dianan di su bida: ni oido, ni compresion, ni cariño, ni cuido adecuado no tabatin p’e di parti di esnan responsabel durante e momentonan cu mas el a anhela esey.
Philomena su poemanan ta den un Papiamento rico, profundo y melodioso. Cu su bon dominio di Papiamento Philomena Wong a aporta grandemente na reconocemento di nos idioma Papiamento.
Den e ultimo añanan aki e tabata traha riba un siguiente publicacion cu tur e poemanan cu e tabatin ainda den tapara. Lamentablemente e no a caba cu e trabou aki, pero un grupo di amiga fiel lo cumpli cu e promesa haci y lo percura pa e coleccion aki keda publica.
E siman aki, dia 8 di maart, nos a celebra Dia Internacional di Hende Muhe. Na cuminsamento di decada 80 e gruponan di hende muhe di e tempo ey a organisa pa prome biaha na Aruba un evento masha grandi den e cantina di John F. Kennedy School cu tabata existi ainda. Sala a yena cu mas di 200 hende muhe di tur edad. Tabatin presentacion di teatro foro, musica y canto, baile, declamacion di poesia, pintura, obra di man, un bon cushina.
Un di e declamadornan tabata Philomena cu a impacta cu su poesia cu mensahe fuerte pa esnan presente. Philomena a fayece dia 7 di maart, un dia prome cu Dia Internacional di Hende Muhe. Pero su bos ta keda resona den su poemanan.
Cu e poema “Tin orguyo”, cu ta den e coleccion Di ta … pa tabata, Philo ta encurasha e hende muhe pa ta orguyoso di su mes y pa ta determina den bida pa logra loke e ta desea.
Philomena, nos ta hopi orguyoso di a conoce bo y ta gradici bo pa loke bo a laga atras pa bo pueblo, pa loke bo a nifica pa cada un di nos. Sosega na paz!
| Tin orguyo
Lanta muhe, lanta! Lanta fo’i rudia! Lanta riba pia, pa bo por para cara cara cu tur cu ta rondona! Pa por kibr’e bara cu tin bo separa di esnan cu ta para! Cana muhe, cana! Cana bo caminda! Cana determina, pa bo por aleha di tur cu tin bo mara! Cana banda banda di tur cu kier cana pa bo por alcansa loke bo ta anhela! Marcha muhe, marcha! Marcha cu firmesa! |
Marcha cu frankesay anima
esnan cu ainda ta na rudia, pa nan lanta riba pia cana y marcha determina, cu e solo meta di wordo acepta como ser igual di tur cu ta rondona: muhe emancipa! Biba muhe, biba! Biba cu fervor! Biba cu balor y planta respet pa loke bo ta, pa loke bo por, pa loke bo kier, p’asina tur esnan cu ta ront di bo comprende cu bo ta orguyoso di ta muhe! |
Poema for di: Di ta … pa tabata, 1992