Por lo pronto, no ta posibel pa organisá eventonan públiko debí na e krísis di Covid-19. Esaki, mirando ku durante eventonan públiko e riesgo di kontagio ku Covid ta muchu mas haltu dor di entre otro e kantidat di partisipante i diferente otro faktor.
Sinembargo, denter di e reglanan vigente i bou di sierto sirkunstansia, Gobièrnu di Kòrsou a hasi posibel pa tòg risibí un eksonerashon pa organisá un enkuentro òf aktividat “Covid proof”. Mas ku klaro, semper miéntras por evitá i garantisá ku ta tene debido kuenta ku e riesgonan di kontagio tantu pa e organisadó komo e partisipantenan durante e aktividat òf evento akí.
Ya ta asina ku pa por organisá un evento, den mayoria kaso, tin mester di un pèrmit di evento. E eksigensia aki ta mará na lei i mester hasi e petishon aki promé na ‘Vergunningenloket’. E pèrmit di evento ta un di e rekisitunan ku mester wòrdu inkluí huntu ku bo petishon pa eksonerashon. Tuma nota, ku e eksonerashon akí ta nesesario pa tur sorto di aktividat i evento durante e krísis di Corona, no opstante di e pèrmit di evento ku mester atkerí adelantá.
Tene na kuenta tambe, ku ta importante ku kada petishon mester inkluí no solamente kiko e aktividat ta, pero mas bien spesífikamente kon e aktividat ta tuma lugá i kiko ta e plan di seguridat. Ta importante tambe pa entregá esaki sigur 3 siman promé ku e aktividat tuma lugá, pa motibu ku e trayekto pa por duna un konseho, ta tuma 10 dia.
Tur e kondishonnan pa e eksonerashon akí ta ampliamente aksesibel via di e página di www.kalamidat.cw bou di e ‘tab’ di eksonerashon. Aparte di e kondishonnan, tin tambe e formulario pa esnan interesá yena i asina entregá un petishon ofisial na e ‘Toetsing- en Advies Commissie’ (TAC). TAC na su turno ta evaluá e petishon i e dokumentonan entregá i ta duna konseho na e Tim di Krísis. Na final, e Tim di Krísis ta esun ku ta tuma e desishon final si e aktividat òf evento por risibí e eksonerashon pa tuma lugá.
Un konseho pa evento den tempu di Covid-19 no ta un pèrmit, pero mas bien un manera pa Gobièrnu motivá hende pa ora tòg ke organisá algu, hasi esaki den formanan alternativo miéntras ta tene kuenta ku protekshon di hende den nos komunidat. Dor di duna e konseho adelantá, Gobièrnu ke evitá tambe ku organisadónan ta pèrdè invershon i tempu innesesariamente.
