Resientemente, dies (10) trahadó di Sentro di Detenshon i Korekshon Kòrsou (SDKK) a risibí nan sertifikado komo mèntòr despues di a terminá e kurso titulá “Mentoria den SDKK” ku éksito. Ta trata aki di un kurso di e sistema moderno pa guia detenidonan.
Señora drs. Marelva Jansen-Liberia, fasilitadó i coach, ta e persona ku a duna e kurso ku tabatin un durashon di tres luna. Komunikashon tabata sentral den tur seshon, ku un enfoke spesial riba motivá i inspirá e kliente. Ta importante pa usa un lenguahe di komunikashon positivo pa por logra éksito, konsientisashon i korekshon serka e klientenan. Temanan ku tambe a keda tratá durante e kurso ta: Nos komo tim, ‘Kambio di mentalidat’, ‘Poder di aktitut’ i ‘Sali for di bo zona konfortabel’. E kurso a keda repartí den un parti teorétiko i tambe un parti práktiko. Na final, e kurso a sera ku un eksámen i tambe un tarea pa opservá klientenan.
Durante di e seremonia di entrega di sertifikado, a hiba palabra señora Marelva Jansen- Liberia, direktor interino di SDKK, señor Richenald Ricardo i tambe hefe di detenshon señor Ludwin Maria. Kursistanan, señor Eugene Bernadina i señor Rolando Monte a demostrá nan gratitut na e fasilitadó i tambe gerensia pa e oportunidat duná na nan komo trahadó di prizòn, pa asina por a sigui e kurso di “Mentoria den SDKK”.
Gerensia ta sumamente satisfecho ku e resultadonan positivo di e kurso i ta asentuá ku guia i korekshon di klientenan mester ta sentral den e instituto.
